Nuggets lakah Wolves an tho

Minnesota Timberwolves chuan playoff game 1-ah Denver Nuggets hneh lo mah se an tho chhuak leh nghal a, nimin zing khan 119-114 in an chak. Team pahnihte hi an intumtawk avangin an inkhel a la hmuhnawm dawn chauh.

Ball Arena, Denver-a inkhelah Nuggets-in bul an ṭan ṭha zawk a, first quarter-ah 39-25 in hma an hruai. Mahse second quarter-ah Nuggets an inthlahdah a, an basket a tan laiin Wolves lamin Julius Randle, Anthony Edwards leh Donte DiVincenzo te hmangin Nuggets an hnaih hret hret. Nuggets tan Jamal Murray-a'n second quarter tawp dawnah court chanve aṭangin three points a lut hlauh a, 64-64 in chawlhlawk an hmang.

Third quarter-ah Nuggets-in hma an sawn leh deuh a, Nikola Jokic-a hoin 93-90 in third quarter an khar a, hma an hruai let. Mahse, third quarter-ah Wolves tan, DiVincenzo-a'n minute khat vel la awmah three points a lut a, Nuggets-in Jokic hmangin chhang let mah se an chesual chhunzawm a, point an score chhunzawm theih loh avangin 119-114 in Wolves in game 2 an la.

Wolves tan player paruk zetin point 10 an score tling a, an chakna chhan pakhat a ni. Nuggets player pangain point 10 nei tling mah se an vanduai zan an tawng a, point nga lekin an chak lo. An thiampuipa Jokic chu mimal takin a che ṭha lehpek a, point 24 leh assist pariat a nei a, rebound vawi 15 la bawkin triple double a siam leh teuh hle. Jokic hian triple double vawi 199 a siam tawh a, Russel Westbrook (209) record a khum theih a rinawm.