Punjab-in Inter Kashi an ngam

Thawhṭanni zan Indian Super League inkhel awmchhunah goal thum a lut a, a khungtu chu Punjab FC an ni–an mikhual Inter Kashi chu 3-0 in an sawp a, table-ah pasarihna daih ni mah se, hmahruaitu Mohun Bagan an phak lohna hi point ruk chauh a ni!

I League champion hlui Punjab tan Samir Zeljković, Effiong Nsungusi Jr leh Bede Osuji ten goal khat ṭheuh an khung a, hun tawp thlenga goal dang a luh loh avangin I League champion ni chunga ISL inpetkai Inter Kashi an tlawm.

Punjab hian match 18 an khelh aṭangin point 14 an nei tawh a, hmahruaitu Bagan an phak lohna hi point ruk ni mah se, match khatin an khel tlem zawk bawk–table-a pasarihna hian champion beiseina an nei tihna a ni.

Mizo player awm lohna Punjab hian league match nga khelh tur an la neihah an chunga awm, table-a pahnihna Mumbai City leh East Bengal an la tum dawn bawk a, champion an beisei pawh hi thil awm tak a ni.

Tarlan tawh ṭhin angin, tun season ISL hi season dang zawng aiin a rei lo bik a, league match 13 chauh khelh a ni dawn–season dang angin knockout hmanga champion zawn a ni dawn lo a, match 13 khelh hnua point hmu sang ber chu ISL champion an ni ang.