Nice-ah Boga leh Moffi let tawh dawn lo

French club hlun OGC Nice co-president Maurice Cohen chuan, an player loan-a chhuak mek pahnih Terem Moffi leh Jérémie Boga-te chu an khelh mekna club te chuan a nghetin la lo mah se, Nice-ah an kir tawh dawn lo tih a sawi.

Nikum November khan Nice hian a zawna vawi ruk an chak lohna ni turin Lorient an hneh lo a, inkhelh banah fans lungawi lo chuan team bus an bei a, inbeihna thlengah Moffi leh Boga te hian hliam an tuar. Player pahnihte hian chawlh la chhunzawmin an contract tihtawp dil mah se, club-in a remti lo thung.

Moffi leh Boga te hian January transfer window khan, lungawi lo takin Nice an chhuahsan a, Moffi hian Porto panin Boga-a'n Juventus a zawm bawk. Player pahnihte hi loan-in an chhuak ve ve a, a ngheta luh theih dan an nei ve ve bawk.

Nice co-president Maurice Cohen chuan, player pahnih hian Allianz Riviera-ah (Nice Stadium) hma lam hun an nei tawh lo, tih a sawi. Cohen chuan, "An khelh mekna club-te hian lei hlen duh lo pawh ni se, Nice-ah hian an rawn kir tawh lo ang," a ti.

Football journalist rintlak Fabrizio Romano tarlan danin, Juventus hian pound maktaduai ngaa Boga lei hlen theihna awm chu hman ṭangkai an tum. Ivorian winger hian he Italian club-ah hian awm hlen a châk hle bawk.

Porto pawh hian Moffi lei hlenna remchang hi an nei ve a, mahse Portuguese club hian Moffi chungchangah engmah thuchhuah an la nei lo thung.

Nice hian zanin dar 12:30-ah Strasbourg nen French Cup final luh an inchuh dawn a, Nice tan tun season-a an nomawi beisei theih awmchhun a nih tawh avangin, chak loh an duh dawn lo a, hnehna chan ngei an tum ang.