Nomawi 11, match 73 zinga 67 chak thei Kento Momota

Badminton ngainatute zingah Kento Momota hming in zawh nawn a ngai lo a, player ṭha pangngai leh a ṭha bik tam tak lo chawr chhuak tawh zingah Japanese tlangval hi chu midang chunga leng a ni.

Kum 25 mi Momota hian season duhawm chungchuang a hmang zo chiah, tun hnai thla 12 chhung khan nomawi 11 teh meuh a chawi - a nomawi chawi zingah inelna ngaihhlut World Championships, Asia Championships leh All

December 15, Pathianni khan season kharna leh a thiam pariat inelna ni bawk Badminton World Federeation Tour Finals chu a hmawr bawkna neih a ni, nomawi inchuhna inkhel hmuhnawm takah Momota hian game a hloh hnuin Anthony Ginting a hneh; kum tawp a khar dan pawh duhthusama ṭha a ni.

Japanese badminton player Momota hi September 1, 1994 khan Mino, Kagawa-ah a piang. Naupang te a nih lai aṭangin badminton hi a khel nghal a, lehkha zir bakah infiamna chu kalkawp puiin zing leh tlaiah badminton a khel ṭhin.

Asian tlangval a ni a, badminton a ngaina hi a mak lo. Chutihrualin Chinese leh Malaysian player ten he infiamna an awpbeh ṭhin dan leh ram dang mi tana chawr chhuah a awlsam lohzia pawh a hrechiang ang - mahse chung boruak karah chuan huaisen takin a ding ngam.

Kum 2011 World Junior Championship-ah khan inlanin a hlawhtling nghal mai lo, semifinal-ah Malaysian junior player Zulfadli Zulkiffli a ngam lo. Senior huanga a inlanna hmasa ber chu 2011 Japan National Championship niin hetah pawh hian final-ah a chak lo leh bawk.

Inelna a hmachhawn hmasak lamah hlawhtling nghal vek lo mah se a theihna thup theih a ni lo a, beidawng loin hmalam a pan zel - a tawi zawnga sawiin 2016 Rio Olympic-ah khan Japan aiawh thei tur zingah a tel.

Mahse, a hun laia world number 2 hi dan phal loh a pawisa thapnaah a inhnamhnawih tih hriat chhuah a ni! Japanese player zingah World Federation Super Series Masters Final champion thei hmasa ber ni mah se infiamna khawmpui liana tel thei lo turin hrem a ni.

Hun rei tak chhung inkhel thei loin a awm a, a chawlh chhung hian lungngai taka indawm kun mai loin training chu ngawrh takin a nei chhunzawm zel; tun hma lama a nihna aia ṭha zawk khan khawvel hmaah rawn kir leh a tum a ni.

Kum 2017 tawp lam khan Kento Momota chuan hremna hmang zoin Japanese national team-ah a rawn kir leh thei ta. Amaherawhchu a inkhelh loh rei avangin a ranking a hniam a, point a neih tlem avangin 2018 All England Open khan a tling phak lo hial.

Badminton Asia Championship neih leh hmasak berah erawh ropui takin a champion leh thei tawh a, inelnaah hian Olympic champion Chen Long chu final-ah a hneh a ni, a hnu lamah erawh tha thlah loin hmalam panin a kal char char tawh.

Momota chuan, "Midang zinga inkhel thei ve loa awm kha a khawhar thlakin a hrehawm ka ti takzet, mihring chuan tihsual leh dai pelh chang kan nei thei, chutiang hunah chuan tlu hlen mai loa a hma aia ṭha zawka thawhchhuah theih hi a pawimawh lai chu a ni," tiin a sawi.

Ban vei lam hmang thiam Momota hian kuminah khan match 73 ngawt a khel a, amah ngei pawhin a beisei aia tam match a khelh theih thu a sawi. Vawi ruk chauh a chak lo a, player dang ten an la tih theih ngai loh chu a ti thei hial.

Malaysian legend Lee Chong Wei chuan 2010 khan title 10 a la thei a, tunah chuan Japan tlangval (11 titles) hian a rawn khum. Momonta chuan, "Lee Chong Wei-a record ding lai chu ka khum ta ngei mai, mahse ani nen chuan khaikhin chi pawh ka la ni lo," tiin a inngaitlawm hle.

Hremna a hman zawh hlim, 2017 July thla kha chuan Momonta hi world ranking lamah pawh 282-na daih a ni, zawimuanga hmasawn zelin nikum August thla khan chuan number 7 ni chungin World Championship a hmachhawn leh thei tawh, a champion zui. Kumin August thla aṭang kha chuan a chung berah a awm leh char char tawh.

Badminton player ropui Lee Chong Wei chuan kumin June thla khan a hnar cancer vangin infiamna a chawlhsan tawh a, Malaysian player hian tun hma lama a inkhel a en fo tawh Momota chu 'Player ṭha famkim' tiin a lo sawi tawh.

Player leh expert tam takin a thiam leh theihna an fak ning lo a, inelna a hmachhawn hnuhnung berah pawh khan Denmark chief coach hlui Steen Pedersen chuan nasa takin Japan tlangval hi a fak.

TV lama commentator ni ta Pedersen chuan, "Momota hian singles player ṭhain a neih tur ang zawng zawng chu a nei kim vek a, a theihna a sangin tun dinhmunah chuan midang chunga leng a ni," a ti. Tokyo Olympic thlen hmain thla sarih chauh a awm tawh a, hliam nei loa a inlan a nih chuan player dang tan hmachhawn a chakawm loh ang.