Paul Pogba a la damlo

Manchester United mid-fielder pawimawh Paul Pogba chu a kerek hliam dam tawh mah se dam lohna dang a nei a, a rawn kir hun tur tak a la hriat theih loh thu manager Ole Gunnar Solskjaer chuan a sawi.

France international Pogba hi September thla aṭang khan hliam vangin a la inkhel leh lo. Tun kar chhung hian training zawm thei tua beisei a ni, kar hmasa Zirtawpni khan an ramah a unaupa nupui neihnaah a kal a, club lama a kir leh hnuah a damlo tih hriat a ni.

Man United manager Solskjaer chuan, "Ni hnih a chawl leh tawh a, a rawn kir hun tur a tlai leh deuh sawt ang," tiin a midfielder chungchang a sawi. Pogba hian season kal laiah United tan match ruk bak a la khel lo. Kum 26 mi Pogba hian tun hnaiah neuh neuh a ngah angreng hle, a club hlui Juventus nen sawizawm a hlawh bakah Spanish club lian Real Madrid hming a ri bawk - a hliam damin rawn kir pawh ni se a hma hun hi sawi zui hlawh a nih leh a rinawm.