Pep-a'n Arteta hmanhmawh turin a duh

Arsenal nena indawr mek Mikel Arteta chu Manchester City manager Pep Guardiola chuan thutlukna siam hma tura a duh thu a sawi a, hna thawk tura hmun danga kal a duh a nih chuan lawm taka a pawm tur thu a sawi bawk.

Man City assistant manager Arteta hi tun hnaiah Gunners chief executive Vinai Venkatesham leh club neitu Stan Kroenke fapa Josh te nen an inbe tawh a, thu mum la nei lo mah se inbiakna chu thui tak an nei ngei tawh tih a chiang.

Man City manager Pep chuan, "Thutlukna a siam thuai ka beisei, club lian enkawl theihna hun a neih chuan thil ṭha tak a ni ang," a ti. Spanish manager hian Etihad Stadium a pan tirh khan Arteta hi thawhpuia a sawm hmasak zinga 

mi a ni.

Arsenal captain hlui Mikel Arteta hi player a nih lai khan khawvela ṭha ber leh langsar ber chu a ni kher lo mai thei. Mahse, a thluak a fimin thutlukna a siam thiam a, Gunners manager Arsene Wenger khan a finna a hmuh hmaih lo - player dangte kaihruai tur khan a ringtawk hle a ni.

Kum 2014 daih tawh khan Arteta hian team kaihhruai a duh leh tum dan a lo sawi tawh. Spanish tlangval chuan, "A pawimawh hmasa ber chu player ten an theihna 120% an hlan tur a ni. Chutiang a nih loh chuan ka hnuaia khel thei an ni lo ang.

"Hnathawh a hunah rim takin kan thawk ang a, hlim a hunah erawh chuan ka hoin a hlim leh nuamti ber ber kan ni leh ang; heng hunah pawh hian a pawimawh ber chu club tana inpekna tho a ni, football hmuhnawm bakah a nih dan tur anga ni thlap hi ka duhdan a ni," a ti. 

A thusawi leh season nga a chamchilh chhunga a chet hmangah khan Arsene Wenger kha a lungawi a, manager ropui Wenger a chhuah pawh khan a hmun ruak luah turin a thawm a ri ring hman hle - mah se an inrem thei ta rih lo.

Arsene Wenger thlaktu Unai Emery-a'n beisei a phak loh avangin ban a ni, a hmun ruak luah tur a la chiang lo. Khawthlang media lamin an tarlan dan chuan Arteta hian Gunners enkawl turin season khatah pound maktaduai nga a hlawh dawn niin an tarlang der tawh.

Kum 37 Arteta hian a club hlui sawmna hmasa a hnawl chhan kha transfer chungchang thlenga thuneihna neih a duh bakah sum hman tur a mamawh ang pek a phut a, a thawhpui turin a duh ang staff neih tel nghal a duh bawk. Club thuneitu lamin tawnhriat la ngah lo Arteta chungah hetiang mawhphurhna zawng zawng hi an hlan ngam bik lo.

Tuna thuthang langsarah chuan Arteta-a'n Emirates Stadium a pan a nih chuan Guardioala hnuaia assistant hna thawk lai Rodolfo Borrell chu a ruala kal nghal tura sawi a ni. Bayern Munich leh Man City lama Pep thawhpui Domenec Torrent pawhin North London club lamah a mutbu a tel a rinawm.

Premier League club dang Everton pawh manager nghet nei loin an awm mek a, tun hnaia thu thar berah chuan Carlo Ancelotti chu an club enkawl tura an duh ber nia tarlan a ni - thu chiang tak erawh a la awm thei chuang lo.

Italian manager hian tawnhriat a ngah tawk tawh, Napoli chuan Champions League last 16 a luhpui aṭanga darkar hnih pawh a liam hmain an ban; tunah hian hna nei loin a awm mek. Chelsea manager hlui hian team lian lo zawk enkawl tura England lama kir leh hi a duh ang em tih chu zawhna awm a ni bawk.

Toffees chuan thuchhuah siamin, "Tun chinah chuan contract ziahpui kan la nei lo, club hian manager nghet tur chu a zawng ngei mai. Mi hrang hrang pawh a bia, a rang thei ang berin thutlukna siam tum a ni,"an ti. Club neitu Farhad Moshiri chuan Ancelotti hi a duh nia sawi a awm bawk a ni.