Serie A-in ngaihdam dil

Italian football-a league sang ber Serie A thuneitute chuan anti-racism campaign-na atana zawng lem an hman chungchangah ngaihdam an dil a, Serie A chief executive Luigi De Siervo chuan, "Kan thiltih hi a dik lo tih kan hre tawh a ni," a ti. 

Italy-ah vun rawng avanga inthliarna a hluar a, tun hnaiah Serie A-ah thil thleng a tam lehzual hle. Hei vang hian Serie A pawhin hma an la a, mahse an campaign poster atan zawng lem ber kher an hmang - hei hi vun rawng inhmuhsitna lantir ṭhin hoin midang tih el nana an hman ber a ni. 

Serie A hotupa De Siervo chuan, "Serie A chuan vun rawng inthliarna leh hmuhsitna hrim hrim hi a haw takzet a, kan league-ah hmun a chang tur a ni lo," a ti a, February thla tawp lamah vun rawng inthliarna do tura an ruahmanna an phochhuah tur thu a sawi bawk. 

Hetihlai hian zawng lem ziaktu Simone Fugazzotto chuan, "Vun rawng inhmuhsit nan zawng an hmang ṭhin tih ka hria a, kan vai hian ang khat vek kan ni tih pholan ka tum mai a ni," tiin a lemziak chu a sawifiah. Serie A club zingah AC Milan leh AS Roma te chuan zawng lem hman hi na takin an sawisel a, vun rawng inthliarna duh lo pawl FARE leh Kick It Out te chuan na takin an sawisel bawk.