Badminton legend F. Zokima a thi

Mizoram badminton tana mi hlu, senior inelna lama hming chher tak F. Zokima chu nimin khan cancer natna avangin a thi a, Chatlang Lily Venga cheng Mizo badminton legend hi kum 77 mi a ni.

Zokima hi BWF World Senior Championship-ah India tan vawi hnih inlan tawhin, kum 2013 khan Turkey-ah India ai a awh a, kum 2017 khan Cochin, Kerala-ah India aiawh vekin a inlan bawk.

Kum 2013 khan 37th Veterans National Badminton Championship, Mumbai khawpuia neihah 60+ Men's singles category-ah inelna hmachhawnin, silver medal a lo hlap chhuak tawh a, national huapa a hlawhtlinna ringawt pawh hi a tam hle.

Mizoram Badminton Association (MBA) chuan thuchhuah siamin, "Mizoram Badminton tana mi hlu leh national level-a Mizote tana sulsu hmasatu, badminton game chawi lar a, Mizoram tihmingṭha ṭhintuin natna khirh tak tuara chatuan ram min pansan ta hi a pawi kan tiin kan ui takzet a ni.

"He hun thim leh harsa tak karah hian a chhung leh khat, ṭhenrual ṭhaten Pathian thlamuanna leh awmpuina an chan ngei theih nan kan dilsak a ni," an ti a, "Mual a liam a, mahse, kan nghilh lo ang," tiin an thlah.