Chawhma dar 9:30-ah Bethlehem VT vs Electric Veng

MBOCWWB 8th Inter Village Football Tournament 2026-ah vawiin chawhma dar 9:30 hian football thiam veng pahnih Bethlehem Vengthlang leh Electric Veng te an inkhel dawn. BVT hi CYMA Football hnuhnung bera finalist an ni a, CYMA Football leh Red Ribbon Football thlenga champion tawh Electric Veng lakah fiahna hautak an hmachhawn ang.

Electric Veng hian round of 32 lut turin team ṭha Chite Veng 3-2 in an hneh a, inkhel hmuhnawm tak an pho chhuak. Midfielder Vanlalremkima Hmar fitness a ṭha a, Electric Vengin an ṭangkaipui hle. BVT hian Ramhlun Vengthar 5-2 in an sawp thung a, tawnhriat nei ṭha Lalrammawia ten an la ho avangin an tawh a khirh dawn.

Vawiin hian team ṭha Ramhlun South pawh an inlan dawn a, an khingpui tur hi Hlimen an nih avangin chak chiang saa dah an rem lo. Durtlang erawh an muala Bawngkawn West an hmachhawn dawn avangin hna a awlsam tura ngaih a ni.

Tun ṭum inelna pekchhuah phalna hi BR Studio chuan an lei a, inelna ṭantir lam hi a thlawnin BR Studio YouTube channel-ah a en theih. Inelna sang chinah erawh en man a awm thung ang.