Aizawl FC tan relegate a hlauhawm em?

Aizawl FC-in tun season-ah a tawp an khar ṭhin lo a, Indian Football League khel zel tur erawh chuan a tawp an khar ṭhat a ṭul dawn. Coach R. Lalruatfela hote hian I Day Football-ah ṭha takin bul an ṭan a, semifinal-ah Chanmari FC lakah an chak loin an tla. MPL12-ah AFC hi hneh loh nei loin league winner an ni a, final-ah Chanmari FC hneh loin an hmelma nomawi chawi lai an thlir.

IFL-ah Aizawl FC-in Chanmari FC aiin bul an ṭan ṭha zawk a, Mizo Derby-ah hnehna changin Championship stage khel ngei tura ngaih ni mah se season tawp lamah an che chhe hle. Chanmari an hneh hnuaah khualmualah match li an khel a, point khat chiah an hlawh chhuak.

AFC hi Gokulam Kerala lakah 4-2 in an chak lo a, Sreenidi Deccan 1-1 in chelh mah se Dempo SC lakah 3-0 ngawtin an chak lo. Match tawp berah Shillong Lajong an tlawh a, point khat pawh hmu se Championship stage khel thei an ni a, 6-1 in an mualpho. Mizo club hi relegation stage khel tur zingah point an hmu sang ber a, chutihrualin a hnuai bera awm Namdhari nen point hnih chauhin an inthlau.

Relegation stage hi Deccan Arena, Hyderabad-ah vek khelh a ni dawn a, Mizo club hian match hmasa berah Punjab club Namdhari an hmachhawn dawn. Coach R-a hoten Namdhari hneha bul an ṭan a nih chuan IFL khel zel turin an dinhmun a ṭha ang a, an chak lo a nih erawh chuan hmabak a harsa khawp ang.