Chennaiyin leh Mohammedan inhnehtawk

Indian Super League inkhelah Thawhlehni zan khan Chennaiyin chuan Mohammedan SC an mikhual a, team pahnih hi goal khung loin an inhnehtawk.

Chennaiyin tan PC Laldinpuia, Laldinliana Renthlei leh Lalrinliana Hnamte ten inkhel bul an ṭan vek a, Mohammedan lamah Lalthankima leh Lalngaihsaka (Thathana) ten inkhel bul ṭanin, player pahnih an langsar hle.

Kolkata club tan hian Rochharzela chu bench aṭangin lut mah se, danglamna thlen turin hunin a daih tawh lo a, 0-0 in team pahnih an ṭin ta a ni.

Nizanah ISL inkhel a awm lo a, zanin dar 7:30-ah Kerala Blasters-in Odisha an mikhual thung ang. Blasters hian Ashley Westwood-a hnuaiah harhtharna an chang a, league match thum chu a zawnin an tlawm ta lo.

Westwood-a'n Blasters a enkawl hnuah Mizo midfielder Freddy Lallawmawma'n hmun lailum a chang a, R. Lalthanmawia an kawl tel bawk. Odisha hian K. Lalṭhathanga (Puitea), Isak Vanlalruatfela, Vanlalzudika Chhakchhuak, Jeremy Zohminghlua leh Lalrinfela Khiangte an kawl thung.