Real chakna Mbappe leh Vini Jr

Spanish club lian Real Madrid chuan Thawhlehni zan khan Alaves an mikhual a, 2- 1 in hnehna an chang a, Vinicius Junior leh Kylian Mbappe ten Real tan goal khat ve ve an khung a, Alaves tan Toni Martinez a khung chu scoreline cheimawitu chauh a ni.

Santiago Bernabeu-a inkhelah mikhual team-in chance an nei hmasa zawk a, minute hnihna lekah Lucas Boyé-a'n chance duhawm a hlah nghal. Boye hian khung ngat se chu inkhel result a danglam thei ang.

Mualneitu team-in inkhel an thunun chhunzawm a, minute 30-naah goal an khung ta nge nge. Mbappe-a'n box pawna ball a vir kualpui hnuah pet nghalin, Jonny Otto-a per hnuah goal-ah a lut a, Alaves keeper Antonio Sivera a che hman lo.

French forward Mbappe hian goal khung theihna chance nei chhunzawm mah se, goal a keng tel tawh lo a, Trent Alexander-Arnold leh Eder Militao ten an chance neih an hlah bawkin, first half-ah goal dang a lut tawh lo.

Second half-ah pawh Real an hlauhawm leh nghal a, corner aṭangin Aurelien Tchouameni-a'n a tauh lut teuh hle a, a per chu Jude Bellingham-a'n hnai tak aṭangin a tauh over bawk.

Minute 50-naah Vini Jr-in box pawna a ball hmuh chu a insiamrem hnuah goal-ah a pet nghal a, goal kilah tak pet lutin an hmahruaina a belhchhah a, Sivera-a'n a ban pha lo a, goal mawi bik a ni.

Hun tawp dawn lamah erawh Real an inthlahdah a, Alaves-in vawi tam chance an neih hnuah Toni Martinez-a'n a kheng goal a, an siphurh sut ṭhen mah se goal dang khung nan hun a awm tawh lo. Alaves player te goal hmaa an hriam loh bakah Andriy Lunin khelh ṭhat zan an tawng a, a tlawm zawkah an ṭang.

Real hian point 73 hmuin point rukin Barca an phak lo a, match ruk khelh tur a la awm avangin thil a la danglam thei thung. Chutihrualin nizan khan Barca hian Celta Vigo an mikhual a, an result kan hre hman lo, an chak a nih chuan Real nen an inthlauhna a danglam leh ang.