Team huaisen Inter-in Coppa Italia final lut

Thawhlehni zan Coppa Italia semifinal second leg khelhah, Inter Milan chuan Cesc Fabregas-a enkawl Como laka goal hnih an chhuah hnuah, goal thum khungin inlehthalna ropui an lantir a, final khel turin an inpetkai.

Como tan Martin Baturina leh Lucas Da Cunha ten goal khung hmasain, Inter-in Hakan Calhanoglu goal hnih leh Petar Sucic te goal hmangin an lehthal a, hnehna ropui bik an chang.

San Siro-a inkhelah team pahnihten goal an mamawh ve ve a, first leg-ah goal an khung theih loh ve ve avangin goal khung an mamawh a, inkhel ṭan aṭangin an innawr na nghal hle.

Minute 32-naah a nawr na zawk Como-in goal an khung ta nge nge a, Ignace Van Der Brempt-a'n Federico DiMarco a tlanpelh hnuah a cross-in, Baturina-a'n awlsam takin a pet goal a, Como-in hma an hruai. Inter defender Akanji-a'n Baturina a veng ṭha tawk lo.

Inter forward pahnih Ange-Yoan Bonny leh Marcus Thuram ten chance nei ve mah se, an vanduai zan an tawng a, goal an khung thei lo. Lautaro Martinez chu hliam vangin a inlan thei lo a, Argentine forward tel loin Inter an hriam tawk lo, goal khung loin chawlhlawk an hmang.

Second half-ah Como bawk an langsar leh a, minute 48-naah Piotr Zielinski pass sual nangchingtu Nico Paz-a'n Da Cunha tan ball ṭha zet pein, Da Cunha-a'n tawih zetin a khung a, an hmahruaina a belhchhah.

Goal hnih chhuah mah se Cristian Chivu naute an beidawng duh lo a, huaisen taka an nawrin minute 69-naah Calhanoglu-a'n an siphurh a sut ṭhen a, Inter an phur sawt. Goal an chhuah hnu lawkah Como tan Assane Diao-a'n keeper chauh a hmachhawn hnuah a pet goal thei lo a, Diao hian khung ngat se chu an chak thei hial ang.

Inter erawhin an chance neih an hlah duh tawh lo a, minute 86-naah Sucic-a ball vawrh luh chu vengtu nei lo Calhanoglu bawkin a tauh lut leh a, an siphurh a sut zo.

Chivu naute an phur laklawh a, minute thum hnu lawkah Sucic-a'n goal kilah tak an chakna goal a khung leh nghal. Goal dang a luh tawh loh avangin Inter an chak.

Tun season-ah Inter hian Serie A leh Coppa Italia-ah chiah nomawi an la beisei a, an nomawi beiseina thamraltir an tum lo tih lantirin, goal hnih an chhuah hnuah an tho chhuak lehin final an lut thei. Coppa Italia final hi May 13-ah khelh a ni dawn a, Inter hian Atalanta leh Lazio-a chak zawk zawk nen nomawi an in chuh ang.