LeBron James hoin Lakers an chak zel

NBA playoff round1 khelh mekah Los Angeles Lakers chuan, an veteran player LeBron James hoin hnehna an chang zel a, nimin zing khan Lakers hian 101-94 in Houston Rockets hnehin game 2 an la. Rockets tan Kevin Durant khel thei tawh mah se a team a chakpui zo lo.

Crypto.com Arena, Los Angeles-a inkhelah team pahnihte an inhnehtawk a, hma inhruai chawk zak zak hnuah Lakers-in 33-26 in first quarter an khar. Second quarter-ah Rockets-in hma an sawn hret a, 54-51 in an inthlauhna an tizim.

Mahse third quarter-ah Rockets hian Lakers an ngam lo a, 75-68 in an inthlau leh tawh. Lakers player zingah James, Luke Kennard leh Rui Hachimura ten Rockets-in an hnaih dawih apiangin point an nei tel thei zel a, Lakers defence a khawng ṭha bawk.

Fourth quarter-ah Rockets an ṭang leh deuh a, KD leh Alperen Sengun hoin basket nei mawlh mawlhin point thum chauhin an inthlau hman. Mahse boruak sangah LeBron James a inlar a, kum 41 mi Lebron hian an mamawh lai takin point a nei thei zel a, a teammate ten an thlawp ṭhat bawk avangin Rockets in an ngam meuh lo a, Lakers a chakpui.

Rockets tan match hmasa lama inlan lo Durant-a'n point 23 a nei nghal a, Sengun (20) leh Jabari Smith Jr (18) te nen khel chhe lo mah se an vanduai chhunzawm a, game 2-ah an tlawm nawn. Rockets hi game 3-ah an chak lo leh a nih chuan round 2 paltlang turin Lakers an hneh vek a ngai tawh dawn a, a awlsam tawh dawn lo.

Lakers erawh an phur chho zel a, regular season tawp lamah inhliam vangin an guard pahnih, Luka Doncic leh Austin Reaves te khel thei lo mah se buaina an tawk lo a, Lebron James leh a naute an tal ngap thei hle. LeBron hi a kum tam ve deuh tawh mah se court chhungah team innghahna ber a la ni thei a, Rockets lakah point 28 zet a la nei thei a, a teammate Kennard (23), Hachimura (13) leh Marcus Smart (25) te khelh ṭhat nan a ṭangkai takzet.

Game 3-ah Lakers hi an chak leh a nih chuan, round 2 khel turin dinhmun ṭha takah an awm tawh dawn a, mahse Rockets tan beisei a la bo loh avangin an inthlahdah thiang lo.