Driver te dinhmun hriatthiampuitu Vettel

Formula 1 champion vawi li lo ni tawh Sebastian Vettel chuan, F1 lirthei thar chungchangah sawiselna tam tak a awm avangin, driver te dinhmun chu a hriatthiampui tih a sawi a, lirthei khalhtute chu F1 hmel tilangtu an nih avangin zahawm taka an awm reng a ṭul tih a sawi bawk.

F1-in kum 2026 season aṭanga hman tur dan thar an siam chuan sawisel a hlawh hle a, sawiseltu zingah Max Verstappen chu langsar berin, he dan thar hi a duh loh em avangin a hmalam hun pawh a chiang lo hial. World Champion Lando Norris pawhin 2026 season chu nuam a tih loh thu Japanese Grand Prix-ah a sawi tawh.

Sawiselna tamna ber chu engine tharah a ni a, engine pangngai leh battery chu 50-50 a sem an ni a, battery-ah chakna lak khawm leh hman chhuah a ngai nasa. F1 car tharte hi inlehpelh kawngah chuan hmuhnawmna awm mah se, car tharah battery energy lak khawm nana hun a duh rei ta deuh chuan sawiselna a ti tam hle.

Hei bakah hian inlehpelh (overtake) nana a bik taka hman tur 'overtake mode' an tel bawk a, he dan hi tun hnai mai khan siam rem hret ni tawh mah se, danglamna a thlen tam leh tam lohah mipuiin rinhlelhnain an la thlir reng.

German driver Vettel chuan, "Sawiselna hrang hrang awmte hi ka hria a, keipawn ka pawmpui. Dan thar hnuaiah hian lirtheite hi khalh chu a nuam tawk viau mai thei, mahse dan thar ruala harsatna lo thleng telte avang hian intlansiak erawh a nuam lutuk lo thung ang.

Chuvangin, driver-te dinhmun hi ka hriatthiampui hle a ni. Chutihrualin he infiamnain a tum ber chu lirthei khalh thiam ber leh lirthei chak ber zawn chhuah a, hnehna chan a ni a, chu chu kan hloh loh a pawimawh hle a ni," a ti.

F1 thuneitu sang FIA leh team te chuan Miami Grand Prix hma hian dan chu thlak danglam hlek turin inremna an siam tawh a, mahse F1 lam chuan heng inthlakna te hi a tam tham loh thu leh, an dan siam tawh sa chu an la thlawp tlat thu an sawi thung.