Abhishek Sharma-a'n century a siam

India opener Abhishek Sharma chuan Thawhlehni zan khan Sunrisers Hyderabad tan century a siam a, Indian Premier League-a match khata run siam tam panga a ni. Sunrisers hian run 47-in Delhi Capitals an hneh a, kum 25 mi Abhishek hian thi loin ball 68-ah run 135 a siam.

Sunrisers hian over 20-ah run 242 an siam a, wicket hnih chauh an hloh. Delhi Capitals tan target a sang hret a, over 20-ah wicket kua hlohin run 185 an siam thung.

T20 batter ranking-a no. 1 nilai Abhishek hian six leh four vawi 10 ve ve an vua a, century siam turin ball 47 chauh a mamawh. IPL bika run siam tam ber chu West Indies opener Chris Gayle a ni a, thi loin run 175 a siam.

Brendon McCullum pawhin thi loin run 158 a siam tawh a, nikum khan tun ṭuma an khelhna stadium-ah bawk hian Abhishek-a'/n run 141 a siam a, Quiton de Kock-a'n kum 2022 khan Kolkata Knight Riders lakah run 140 a siam. Tun ṭuma Abhishek-a run siam hi IPL-a run siam tam lamah pangna a ni.

Abhishek chuan, "Powerplay-ah ka theihna lantir ka tum a, chumi tur chuan captain leh coach te aṭangin thlawpna ka hmu. Ka tan chuan he khelmual hi a hlu a, hemi hmuna century siam hi ka ngai hlu hle a ni," tiin a sawi.

IPL-ah Sunrisers hian match sarih aṭangin point riat hmuin pathumnaah an awm mek a, zanin dar 7:30 hian Mumbai Indians leh Chennai Super Kings te an inkhel ang. Mumbai leh Chennai team-te hian season bul an ṭan ṭha lo a, dinhmun siam ṭhat nan zanina chak a pawimawh ang.