Inter Village Football BVT nge nge; Durtlang an mualpho

MBOCWWB 8th Inter Village Football Tournament 2026-ah Bethlehem Vengthlangin inkhelh thiam veng an nihzia lantirin nimin khan team ṭha Electric Veng 1-0 in an hneh a, goal awmchhun hi Lalrammawia khung a ni. Tawnhriat nei ṭha Rammawia finishing a ṭhat tluk zetin ball petu Emanuel Lalhruaizela hnathawh a ropui.

RG Stadium-a inkhel dangah Saikhamakawnin Tuivamit an hneh hram a, Salem Vengin harsatna nei loin Sakawrtuichhun an hneh bawk. Durtlangah Ramhlun South-in champion zia rawn lantirin Hlimen 6-2 in an sawp a, mahni muala khel Durtlang erawh an mualpho.

Durtlang hian an khelmual tharah Bawngkawn West an mikhual a, goal khung hmasa mah se hun a tawp meuh chuan 6-2 in an chak lo. Bawngkawn West lamin hun tawp lamah chance ṭha an bawhpelh lo a, ISL player tel lohna Durtlang erawhin football team ṭha nei leh turin insiamṭhat an mamawh thung.

Vawiin hian inkhel a awm dawn lo a, inelna hi May 27, Thawhṭanniah chhunzawm a ni ang. Tunah hian round of 32 khelh mek a ni a; Republic Veng, Venghlui, Bethlehem Vengthlang, Bawngkawn West, Salem Veng, Ramhlun South leh Saikhamakawn ten last 16 an lut tawh a ni.