Mizoramah U19 basketball league awm dawn

India-a basketball chawisangtu zinga pakhat, ABC Basketball Development League leh ACG te ṭangkawp chuan Mizoram Basketball Association thawhpuiin Aizawlah under 19, Northeast Elite Basketball League a buatsaih dawn. Inelna hi R. Dengṭhuama Stadium, Mualpuiah June 22, Thawhṭanni aṭangin khelh ṭan a ni ang.

ABC-te hi Mumbai-a business company an ni a, an CEO Aniruddha Pole chuan, "India hmarchhak state-te basketball-a hma an sawnna turin inelna hi buatsaih a ni dawn. Aizawlah hlawhtling takin Mizoram Super League khelh a ni a, MSL boruak ṭha tak avangin inelna buatsaih nan Aizawl kan thlang. Tun ṭuma inelna hmang hian Mizote mai bakah Northeast state danga ṭhalaite tan basketball inelna sang zawk an thlen theih ngei kan beisei," tiin Vanglaini a hrilh.

Inelnaa tel tur hian Aizawla basketball ngaina veng 10 - Chanmari, Zarkawt, Dawrpui, Chawnpui, Bungkawn, Zemabawk, Nursery, Tuikual South, Saron leh Chaltlang te chu thlan chhuah an ni. Anni hian an veng chhung mi ngei player pali ṭheuh an neih a ngai dawn a, Northeast state dang aṭanga player an rawn tirhte chu draft selection hmangin, pariat an la leh dawn bawk.

He league atan hian Northeast state danga an hruaituten player ṭha 10 ṭheuh an thlang chhuak dawn a, chung player te chuan Aizawlah trial an nei leh dawn a, trial-a an khelh dan a zirin point pek leh tur niin, draft hmangin team hrang hrangten an player duh an thlang leh dawn. Hei hi team tinte inrualkhai taka an khelh theih nana duan a ni.

Under 19 league hi ni 10 chhunga zawh hman tura ruahman a ni a, hnam dang player te chu an zinna leh thlenna senso zawng zawng an tumsak dawn. Hei bakah hian club tinte sum sen a tlem zawk nan an jersey an tumsak vek dawn bawk. League hi pool A leh B-ah ṭhen hran a ni dawn a, pool pahniha a sang pahihten semifinal an khel leh dawn.

League khelh a nih chhung zawng hian scout an awm dawn a, scout-ten inelnaa che ṭha an tih player panga te chu High Performance Centre, Bangalore-a inzir chhunzawm turin an thlan chhuah an ni dawn a, an zinna leh zirna senso zawng zawng tumsak an ni dawn bawk.

Coach atan MBBA hnuaia tier 1 leh 2 aṭangin a ṭha zual thlan chhuah tur an ni a, referee te pawh tualchhung referee-te hman tur niin, player-te bak state pawn mi hman an ni dawn lo.

ABC leh AGC te hian MBBA nen kum nga daih contract an ziak a, kum nga chhung hian inelna hi Aizawlah kum tin an buatsaih dawn. Kum lo la awm zel turah chuan hmeichhe inelna pawh buatsaih tum a ni bawk.

MBBA president R. Lalnunpuia chuan, "ABC leh ACG ten kan ram chhungah ngei, 'risk' lain league an rawn buatsaih a, Mizote lakah beiseina sang tak an nei tih a lang. Kum nga chhung kalpui tur a ni a, Northeast ṭhalai infiammi ten hmakhua ṭha zawk an neih theih nan an duan a ni a, a hlawhtlin ngei theihna turin MBBA pawhin hma lan lakpui dawn," tiin Vanglaini a hrilh.