Tuin nge Rosenior thlak dawn?

Chelsea-in Liam Rosenior an ban a, tunah chuan "Tuin nge thlak ang?" tih chu zawhna langsar tak a ni mek a, Chelsea chuan, "Head Coach nghet kan neih theih nana theihtawp kan chhuah rualin, rei tak Blues enkawl tur kan lakluh theih nan keimahni ngei pawh kan inenfiah dawn a ni," an ti.

Tun dinhmunah Chelsea-in coach dawr la nei lo mah se, enthlak erawh an nei nual a, Rosenior an ban rualin hming ri ring tak tak a awm nghal nual - Blueco-in Chelsea an lei hnuah manager panga an nei tawh!

Bournemouth head coach kal chhuak tur Andoni Iraola chu hming ri ring pawl a ni a, mahse, kum 43 mi coach hian coach ban awlsam tak club pan a duh lo niin an sawi - Chelsea chu an ni lo phawt.

Hei mai a ni lo. Cherries pawhin chelh an tum coach hian Spain-a a chhungte bula kir a duh nia sawi a awm bawk a, chuti a nih chuan English football-a cham chhunzawm ai chuan Spanish club enkawl a thlan hmel.

Kum 2024 Champions League final-a Borussia Dortmund hruai thlengtu Edin Terzic hming pawh lam rik zingah a tel a, mahse, kum 2021 DFB-Pokal-a Dortmund champion puitu coach hian June 2024-a Dortmund a chhuahsan hnuah khan club enkawl a nei leh tawh lo.

Chelsea midfielder hlui Cesc Fabregas-a'n Serie A club Como-ah hna a thawk ṭha thlawt a, Stamford Bridge-a kir thei anga sawi rik a ni mek.

Hetihrual hian Arsenal-in Mikel Arteta an ban chuan Fabregas an hel dawn nia sawi a awm bawk a, Gunners-a hming chhertu coach hian Arsenal fan-te ngaihdamna hlawh chhuak tura Emirates Stadium-a kir a châk zawk mai thei.

Real Madrid ban tak Xabi Alonso hming pawh lam rik a ni a, mahse, Spanish coach hi mahni thu duh ve tak niin, club neituten boruak an neih lenna hmuna kal hi a châk a rinawm lo.

Fulham boss Marco Silva hi coach ṭha tak ni mah se, club lian la enkawl ngai lo a ni a, season tawpah a contract a zawh tawh dawn avangin Blues enkawl chance nei se, a hnar a rinawm loh.

Silva agent Jorge Mendes hi Chelsea neitute nen an inhnimhnai viau nia sawi a awm tel a, Fulham boss hian season thara Chelsea enkawlna chance a nei sang hle.

Chelsea hian Luis Enrique, Hansi Flick, Julian Nagelsmann leh Roberto De Zerbi te pawh tun hmain inbiakna an lo neihpui tawh a, tuna an club kalphungah chuan top coach tan Blues hi enkawl an châkawm rih lo ang.