United-in Tchouameni an ngaihven

Season thara Champions League khel thei dinhmuna ding mek Manchester United-in squad thuam ṭhat lam an ngaihtuah ṭan a, Real Madrid midfielder Aurelien Tchouameni chu lakluh tumin an hel dawn.

United hian season ṭan dawn transfer-ah khan tlarhma lam ngai pawimawhin, Premier League tawnhriat nei ṭha, Wolverhampton Wanderers forward Matheus Cunha leh Brentford striker Bryan Mbeumo bakah RB Leipzig striker Benjamin Šeško an la lut.

Blues hian goalkeeper Senne Lammens chu Royal Antwerp aṭangin an la lut bawk a, tun nipuiah chuan midfield thuam ṭhat hna an thawk dawn nia sawi a ni - Tchouameni bakah hian Nottingham Forest midfielder Elliot Anderson, Brighton & Hove Albion midfielder Carlos Baleba leh Crystal Palace midfielder Adam Wharton te pawh an ngaihven zingah an tel.

Hetihrual hian Ruben Amorim-a duh loh, Michael Carrick-a'n a chhawr ṭangkai em em Kobbie Mainoo-a'n contract thar a ziak dawn hnai nia sawi a ni a, Mainoo hi Wharton nen an khelh dan a inzul deuh avangin Wharton hi an rim chhunzawm lo mai thei niin an sawi bawk.

United hian Premier League pawn lam player pawh an thlithlai nual a, Tchouameni hian an lung a dum hle. Mahse, kum 26 mi midfielder hian Real-ah kum 2028 thleng contract a nei a, Spanish club hian pawhsei an rilruk niin an sawi.

Hetihrual hian Real hian tun season-ah nomawi chawi nei loin season an khar hmel a, chutiang a nih chuan nipui transfer-ah thil inthlak danglam a thlen nual rin a ni - Tchouameni pawh hi United hian man man taka an draw a nih chuan chhuahtir an pawi ti dawn lo.

United hian Tchouameni hi kum 2022 khan AS Monaco aṭanga lakluh tumin an lo hel tawh a, mahse, Real Madrid zawm a thlan zawk avangin Santiago Bernabeu lamah a luhsan.

Real tan hian match 191 khela goal sarih khungin, assist vawi riat a nei tawh a, nomawi chawi theih ang chu a chawi kim tawh bawk avangin chona thar hmachhawn tura Old Trafford pan hi a hreh lo ang.

United hian nipui transfer-ah player hlawh hnem Casemiro leh Jadon Sancho an chhuahtir dawn avangin player dang la lut turin an sum dinhmun a ṭha tawk. Hetihrual hian Barcelona-a loan-a khel mek Marcus Rashford-a hma hun erawh a la chiang lo thung.