Tu nge McFarlane chu?

Chelsea-in season tawp thlenga Liam Rosenior nghah ai chuan ban an thlang a, team lo enkawl lailawk tura assistant coach Calum McFarlane a awm tho avangin an thla a muang.

Kum 40 mi McFarlane hian non-league club Croydon-ah assistant manager niin, a coaching career a zawh ṭan a, non-league club tho Whyteleafe-ah assistant manager a ni tawh bawk.

Kum 2020 khan Whyteleafe hi chhuahsanin, Manchester City Academy a zawm a, kum 2023 thleng assistant coach niin a cham. City a chhuahsan hnuah Southampton Academy zawm lehin, Under-18 leh U21-ah te head coach hna a thawk.

July 2025 khan Saints chhuahsanin, Chelsea a zawm a, Blues-a la luttu hi academy technical director Glenn van de Kraan niin, Van de Kraan hian City-a hun a hman laiin Farlane hi a lo hre tawh a, Chelsea-ah hian a thlem lut.

McFarlane hian Chelsea U21 leh U19 a kaihruai ve ve tawh a, U19 hi UEFA Youth League-ah enkawlin, league phase-ah pakhatna a nihpui - match ruk an khelhah vawi nga chakin, vawi khat draw an nei a, Barcelona, Benfica, Bayern Munich leh Ajax te an hneh.

Chelsea academy-ah hian match 21 a kaihruai aṭangin vawi 11 an chak a, U21 a kaihhruai hnuhnung ber chu January 7 kha niin, Benfica U23 chu 6-2 in an ngam lo.

Blues-in Enzo Maresca an ban khan coach lailawk a ni a, khualmualah Manchester City chu 1-1 in draw pui mah se, Fulham chu khualmualah vek 2-1 in an ngam lo thung.

Chelsea-in Rosenior an lakluh khan academy lamah kir tawh loin, assistant coach hna a thawh chhunzawm a, tunah chuan season tawp thleng atan head coach a ni dawn ta - hmabak erawh a namai lo hle.