World Cup-ah Italy-in Iran thlak dawn lo

FIFA chuan thuchhuah siamin kumin World Cup-ah, Italy chu Iran aiawha khel tura rawtna tam tak awm mah se, chutiang thil chu a thleng dawn lo tih an sawi. Vawi li champion tawh Italy hian thla liam ta khan World Cup khel tur zawnna playoff-ah Bosnia and Herzegovina an hneh loh avangin, a zawnin World Cup vawi thum an khel phak lo.

Ruahman lawk dan chuan Iran hian, an match hmasa pahnihah New Zealand leh Belgium chu Los Angeles-ah an hmachhawn dawn a, a pathumnaah Egypt chu Seattle-ah an hmachhawn dawn.

Mahse, USA leh Iran indona avangin Iran hian World Cup an khel dawn lo tih thawm a ring hle a, anmahni aiawh turin Italy chu dah turin, US special envoy Paolo Zampolli chuan a lo ngen tawh.

World Cup hi June 11 aṭanga ṭan tur a ni a; United States, Canada leh Mexico-ten an thleng dawn a, FIFA dan hnuaiah chuan ram pakhat an inhnuhdawh emaw, hnawhchhuah an nih chuan FIFA hian thuneihna pumhlum a nei a, World Cup regulation Article 6-na chuan, 'FIFA chuan tel tura ruat ram aiawh hian ram dang a dah thei a ni,' tiin a tarlang bawk.

Kar liam ta kha Infantino chuan, "Iran hi khel turin an tling tawh a, team ṭha tak an ni bawk. Player te pawhin khelh an duh a, khel tur pawh an ni. Politics hi chu infiamna chhungah lut suh se," a ti. March khan Iranian Football Federation chuan an match neih ho chu Mexico-a sawn turin an ngen a, mahse Infantino hian USA-ah khel dawn tih a tichiang thung.

US president Donald Trump pawhin Iran Football team hi, World Cup khel tura an US an pan a nih chuan ṭha taka an lo lawm tur thu a sawi tawh a, an himna tura hlauthawng taka an awm chu ṭha a tih loh thu a lo sawi tawh bawk.