Verstappen chhuak lo tura duhtu Norris

Lando Norris chuan Max Verstappen chu Formula 1-ah tlan chhunzawm zel tura a duh thu a sawi a, F1 a chhuahsan a nih chuan infiamna khawvel tan channa nasa tak a tlin tur thu a tarlang bawk.

F1-in bung thar a kai a, F1 hi FIA-in a lo tih ṭhin danin car regulations a thlak thar kum a ni a, nikum kum tawp lam khan thil lian tham tak an thlak nual a, 2026-a hman ṭan turin car bakah engine leh a ke thlengin an thlak vek. Thil thar an duan hi Australian Grand Prix aṭang khan hman ṭan a ni.

Thil inthlak danglam avang hian zawhna leh sawiselna a tam a, sawiseltu zingah Verstappen langsar berin, Dutch driver hian engine tharin mamawh a ngah ta lutuk chu a lo sawisel tawh a, F1 hotute ngaihven khawpin thawm a lo nei tawh.

Dan thar hnuaian nuam a tih loh avangin F1 hi chhuahsan hial a rilruk thu pawh a lo sawi tawh a, mahse tun kar khan FIA chuan driver te thu lawmawm an tichhuak a, dan thar te chu endik bakah siamrem a nih tur thu an puan avangin Norris chuan Verstappen hi F1-ah a la awm reng a rin thu a sawi.

McLaren driver Norris chuan, "Boruak a ṭhat chhoh zel ka beisei a, Verstappen pawhin a vawi nga nan world championship lak a la duh thu a sawi a, chuvangin he inelna hi a chhuahsan mai ka ring lo a, chhuak lo turin ka duh bawk.

A chhuak a nih chuan F1 tan hian a uiawm dawn hle a, ani hi F1 chanchina driver ṭha ber pawl a nih avangin, a chhuak a nih chuan F1 mai ni loin infiamna khawvel tan channa nasa tak a ni ang," a ti.