Bayern final luhpuitu Kane leh Diaz

German champion Bayern Munich chuan Nilaini zan khan, DFB Pokal semifinal-ah Harry Kane leh Luis Diaz te goal hmangin Bayer Leverkusen chu 2-0 in an hneh a, final inpetkaiin treble champion beiseina an chhi nung zel.

Dan pangngaiin Bayern-in ball an chang tam zawk a, Leverkusen tlarhnung rum ṭhaih ngalin, Diaz leh Dayot Upamecano ten goal an khung nghal teuh hle.

Goal khung turin Bayern-in an nghak rei lo a, minute 22-naah Jamal Musiala cross chu Kane-a'n duhtawka a siamrem hnuah chiang zetin an hmahruaina goal a khung. Goal luh nana Michael Olise leh Musiala te ball inpe chu a mawi takzet.

Hmahruai hma mah se goal dang a lut lawk lo a, Kane-a'n chance vawi tam a hlah chhunzawm. English forward Kane hi a vanneih zan ni se goal tam zawk khung thei tur a ni. Kane bakah Musiala leh Josip Stanisic ten an chance neih an hlah ve ve bawk a, goal hmaah an vanduai.

Bayern an vanduai reng lo a, hun tawp nan minute khat a la awm tihah, Olise leh Leon Goretzka-a'n Diaz tan a pe a, Colombian forward hian keeper chauh a hmachhawn hnuah khungin, an chak nemnghehna goal a khung. Goal khung lo mah se French forward Olise a khel ṭha a, goal luhna kawngah inrawlh ve vein a chet dan chu a 'class' thei hle.

Bavarians forward Kane chuan, "A tir aṭanga a tawp thlengin kan khel ṭha a, kan vanneih zan ni se kha aia tam goal kan khung ang. Mahse chak kan phu zawk a, kan chak avangin ka lawm bawk," a ti.

Vincent Kompany naute hi tun season-ah an khel ṭha a, Bundesliga-ah champion tawhin German Cup final an luh leh tak avang hian an phur leh sawt dawn. Treble champion ni turin an kutah engkim a innghat tawh a, Champions League semifinal-a Paris Saint Germain an hmachhawn hunah pawh an inringtawk sawt ang.