Zanin aṭangin C'ship Round ṭan dawn

Indian Football League championship round chu zanin dar 6:30 aṭangin khelh ṭan a ni dawn a, Rajasthan United-in Mizo tamna Sreenidi Deccan an mikhual ang. Rajasthan hian point 17 an hmu a, Sreenidi hian point 15 hmuin champion beiseina nei turin point thum hlawhchhuah a ngai ve ve a, hei vang hian attacking football a beisei theih ang. IFL hi DD Sports bakah Waves leh SonyLiv app hmangin a en theih.

Stage 1-ah khan Sreenidi Deccan hian Rajasthan hi mikhualin 2-1 in an hneh a, Mizo tlangval pahnih Brandon VL Remdika leh Lalthankhuma (TK-a) ten goal ropui an khung. Goal khungtu pahnih bakah Lalromawia inkhel bul a ṭan a, bench aṭangin Lalchungnunga Chhangte a lut bawk. Tun ṭumah pawh hian Mizo tlangvalten Sreenidi tan hmun pawimawh an chan leh ngei a rinawm.