Alisson-a hma hun ka sawi thei lo - Arne Slot

Liverpool head coach Arne Slot chuan chhuak tur anga sawi goalkeeper Alisson hma hun chungchang a sawi theih loh thu a sawi a, Brazilian keeper hi nipui transfer-a Juventus pan tur anga sawi mek a ni.

Slot chuan, "Thil thui tak ka thlir lo a, tunah chuan Liverpool tana a lo kir leh vat hi ka beisei ber chu a ni mai. Alisson-a chungchang chauh a ni lo, player dang leh keima chungchang thleng pawhin, thuthang leng mai mai kan chhang ngai lo.

"Thudik sawichhuah a ṭul hunah kan sawi mai zel a, tun dinhmunah chuan chutiang sawi ngai chu a awm rih lo," a ti a, Alisson-a chhuak tur anga sawi chu thuthang leng mai mai angin a sawi.

Kum 32 mi Álisson hi tunah hliam vangin a chawl mek a, second choice keeper Giorgi Mamardashvili chu a inhliam ve leh bawk - zanin dar 7:30-ah league match khel turin Crystal Palace an mikhual dawn a, third choice keeper Freddie Woodman-a'n si ban a nghah a ṭul dawn tihna a ni.

Slot chuan, "Third choice keeper atana tawnhriat nei ṭha keeper kan lakluh chhan hi a awm a ni. Woodman hi goalkeeper ṭha tak a ni a, a kum a la nau deuh laiin, Euro Under-17 leh World Cup U20 champion team zinga mi ni thei a ni," a ti a, a keeper a rin tawk thu a sawi.

Liverpool hi Premier League table-ah pangana an ni mek a, parukna Brighton & Hove Albion aia match khata khel tlem chungin, point ngain an sang zawk a, season thara Champions League khelhna chance a sang hle.

Hetihrual hian Reds hian Palace hi tun season-ah vawi thum hmachhawn tawhin, an la chak lo vek a, Arne Slot leh a naute hian Manchester United, Chelsea leh Aston Villa an la hmachhawn dawn bawk avangin UCL khel chiang saa dah an rem lo.