City chhuahsan tura inpeih Trafford

Manchester City goalkeeper James Trafford chuan a beisei anga City-ah hmun a chan loh thu a sawi chhuak a, "Nipui transfer-ah chuan thutlukna ka siam a ngai dawn a ni," a ti.

Kum 23 mi keeper chuan, "Tun season zet chu hlim leh lawm lohna a inzat a ni ber a, ka duh angin ka khel tam lo," a ti a, season zawh hunah a hma hun a ngaihtuah tur thu a sawi.

Slot chuan sawi zawmin, "Thutlukna kan siam reng rengin, kan tana ṭha ber tur kan ngaihtuah ṭhin a, chutiang chuan keipawhin City ka zawm dawn khan thutlukna ka siam. Mahse, ke beisei ang erawhin thil a kal ta lo a ni.

"Mahse, ni tin hian hmasawn tumin ka bei a, a êng zawnga thil thlir hram hram a, hlim taka awm hram hram tumin ka bei a ni," a ti a, City chu second choice ni tura zawm a nih loh thu a sawi.

City academy chhuak Trafford hian kum 2023 khan Etihad Stadium chhuahsanin Burnley a zawm a, a chet ṭhat em avangin season ṭan dawn khan lei let theihna dan neitu City hian an lei let.

Season ṭantirah first choice keeper ni mah se, Paris St-Germain keeper Gianluigi Donnarumma chu lei theihin a awm leh ta thut si a, Pep-a'n Italian keeper lam a hawi zui. Trafford-a tan City-ah cham zel pawh ni se, Donnarumma thlak hi chu a harsa ang!

January khan City boss Pep Guardiola chuan Trafford hi chhuak thei a nih thu a sawi tawh a, Aston Villa chuan nipui transfer-a lakluh tumin English keeper hi an ngaihven ṭan nia sawi a ni.

Pep hian Cup inelnaah erawh Trafford hi number 1 a nih tir chhunzawm a, zanin dar 9:45-a FA Cup semifinal an khelh hunah pawh bul a ṭan ang - Southampton an hmachhawn dawn.

City hi League Cup-ah an champion tawh a, FA Cup champion turin match hnih chak chiah an mamawh tawh. Premier League-ah lah hmahruaitu Arsenal nen an point hmuh zat a inang tawh a, Pep-a naute hi domestic treble champion ni thei dinhmunah an ding mek.