World Table Tennis Day hmang

Mizoram Table Tennis Association (MTTA) chuan April 23, Ningani khan MTT Hall, Mission Veng-ah World Table Tennis Day an hmang a, he hunah hian Day pual league khelh niin, ranking no.1 ni chunga season kharte chawimawina hun hman a ni bawk.

World Table Tennis Day league chu chawhnu dar 2:00 aṭanga khelh ṭan niin, Mizorama mipa leh hmeichhe player ṭha pariatten inelna an hmachhawn - mipa inelnaah Lalruatfela chu champion niin, Thangsiansanga chu pahnihna a ni.

Hmeichhe lamah Caroline Malsawmkimi chu pakhatna a ni a, Moumita Saha chu pahnihna a ni thung. Caroline hian ranking number 1 ni chunga season a khar avangin award a dawng bawk a, a langsar hle.

Ranking Awards-ah hian mipa lamah number 1 ni chunga season khartu Jeho Himnakulhpuingheta chu award hlan a ni bawk a, India rama men’s singles-a ranking no. 9 ni mek leh World Table Tennis Championships 2026-a India team-a koh Jeho-a hi Certificate of Appreciation hlan a ni bawk.

World Table Tennis Day lawmna hi zan lamah a kharna hun neih niin, MTTA president C. Lalrinzuala'n a kaihruai a, general secretary R. Lalsangzuala’n report pein, Central YMA treasurer leh MTTA patron C. Duhkima chu khuallian a ni.