Wolves an tho chhuak ve ta

NBA playoff khelh mekah nimin zing khan Minnesota Timberwolves chuan 113-96 in Denver Nuggets an hneh a, game thum an khelh tawhah a vawi khat nan an chak a, 2-1 in an hnufual mek.

Target Center, Minnesota-a inkhelah ṭan aṭangin Wolves an nung nghal a, first quarter-ah 25-11 in hma an hruai a, point 14 zeta falin first half-ah Nuggets-in an ngam lo hle.

Second quarter-ah Nuggets-in bul an ṭan ṭha a, point rawn nei zawn nghal zat mah se an basket a tang rei deuh ṭhin a, Wolves tan Anthony Edwards leh Donte DiVincenzo ten point an neih reng avangin, 61-39 in Wolves-point 22-in hmahruaina an tizau.

Third quarter-ah Wolves an tlahniam hret a, Edwards leh DiVincenzo te kut kal lai a tawp deuh. Nuggets-in rawn hnaih ve hret mah se a hun takah, Bones Hyland-a'n three points ṭum hnih a rawn nei a, a defence ṭhat vanga hriat hlawh Rudy Gobert pawhin, offence lamah a ṭha tel tho tih a lantir bawk a, 68-88 in hma an hruai chhunzawm.

Quarter tawp berah Nuggets-in thapui thawhin pawhthlak tum mah se, an inthlauhna a sang tawh bakah Wolves tan, Ayo Dosunmu-a rawn nung thar a, harsat lutuk loin Wolves-in 113-96 in game 3 an la.

Wolves hi chak mah se an thu lawmawm lo an nei a, an thiampuipa Anthony Edwards chuan third quarter-ah hliam vangin court a chhuahsan a, inkhel tawp thlengin a lo kir tawh lo. Edwards hliam hi hriatchian theih a la ni lo a, game 4 a khelh dawn leh dawn loh a hriat loh. Wolves hi an khel ṭha chho chauh a, Edwards a khelh theih loh chuan an tan channa nasa tak a tling dawn.

Hetihlai hian Nuggets tan an power forward, Aaron Gordon chu game 2-ah a chawn a tihnat avangin a inlan thei lo a, game 4 atan a dinhmun a chiang lo, Nuggets tan Nikola Jokic khel ṭha viau mah se, thlawptu a neih ṭhat tawk loh chuan Wolves-in an lehthal leh theih avangin an dam kim a ngai.