Chelsea-ah Jackson a kir dawn

Senegalese forward Nicolas Jackson chu, loan-a a khelh mekna Bayern Munich chuan a ngheta lak an tum lo a, season tawpah Chelsea-ah a kir leh dawn niin German chanchinbu ten an tarlang.

Jackson hian nipui rualin Bayern a chhuahsan hmel hle a, a loan hun pawh sei leh emaw a ngheta lakluh chungchangah, tun thlengin inbiakna mumal a la awm lo. Season tawp lam a hnaih tawh avang leh club-a a dinhmun thlirin London-ah a kir leh hmel zawk.

Kum 24 mi Jackson hian beiseina sang tak nen Bayern pan mah se, Harry Kane a awm avangin hmun a chang tam lo a, a khelh chhunah khel chhe lo mah se Vincent Kompany rilru a hneh zo lo a, a ngheta lak theih ni mah se an la dawn lo.

Club hruaitute leh coach Kompany te chuan Jackson-a nungchangah sawisel tur an hmu lo a, a khelh dan leh miziaah pawh sawisel tur a vang hle. Jackson hian Bayern tan tun season inelna hrang hrangah, match 28 inlan tawhin goal kua a khung tawh a, a tam zawkah bench aṭangin a lut ṭhin.

Zanin dar 7:00-ah Bayern hian Mainz an lenchilh dawn a, Bayern hian Bundesliga title la tawhin, DFB-Pokal final an lut tawh bawk. Kar lehah Paris Saint Germain nen Champions League semifinal an inhmachhawn dawn avangin player ṭhenkhat tan hahdamna hun an siamsak a rinawm a, Jackson a khelh a beiseiawm.