Martinez a la inkhel dawn lo

Serie A hmahruaitu Inter Milan chuan Pathianni zan dar 9:30-ah Torino an lenchilh dawn a, mahse an striker chhuanvawr Lautaro Martinez chu a hliam a la dam loh avangin a inlan ve thei dawn lo.

Argentine forward hi Champions League last 16-a Bodo/Glimt an hneh loh ṭum khan a inhliam a, hemi hnu hian goal khungin rawn khel ṭha chho hman viau mah se ngai a awh thei meuh lo a, April 5 zana Roma an hneh ṭumin a inhliam leh a, hemi hnu hian a la inkhel leh lo.

Inter hian forward dang pathum - Pio Esposito, Ange-Yoan Bonny leh Marcus Thuram te kawl mah se, Martinez-a hmun ruak an hnawh khat zo lo hle a, che chhia tia sawi tur ni lo mah se mamawh chhanna an tling tawk lo.

Kum 28 mi hi tun season-ah a che ṭha a, Serie A bikah goal 16 khung tawhin a khung hnem ber a, inelna hrang hrangah goal 20 a khung tawh bawk. Inter-in champion nomawi an beisei theih nan a thawh hlawk hle. Kumina khelh tur World Cup-ah pawh a dam ṭhat chuan Argentina tlarhma rinrawl tur a ni.