Turkey-ah F1 tlan leh dawn

Turkey chuan 2027-ah an thleng leh dawn a, Istanbul Park-ah intlansiakna an nei leh dawn niin Turkey president Recep Tayyip Erdogan chuan a sawi. 2021 Turkish Grand Prix hnua an thlen lehna hmasa ber tur a ni.

President Erdogan chuan nimin chawhnu khan Istanbul-a tlangzarhna hunah sulsutu ber niin, F1 CEO Stefano Domenicali leh FIA president Mohammed Ben Sulayem te nen ṭhutkhawmna an nei a, Turkish motorsport-a boruak chawikân leh an tum dawn.

Istanbul Park-a track hi a tlan chak theihna bakah, hmun chhengchhe lai leh kual nuam tak tak a awm avangin mi ngainat a hlawh a, 2021-a COVID-19 hri len laia an tlan bak kha chu F1 inelna atan hman a ni leh tawh lo. He track hian 2005 aṭanga 2011 thleng khan hlawhtling takin a thleng tawh a, kum 2020 khan Lewis Hamilton-a khawvel champion a nih vawi sarihna, hmun kha a ni bawk.

Covid 19 hnuah Turkey hian thleng leh tura inbiakna an nei zui reng a, mahse kum 2022 hnu lamah erawh an sum lamah harsatna an tawh avangin, an thleng chhunzawm thei lo a, sum thehchhuak tam Qatar lamah an insawn ta zawk.

Mahse 2024 khan F1 motor ke sponsor tu Pirelli, Turkish branch-a an Chairman Lale Cander chuan Istanbul Park chei ṭha leh turin dollar maktaduai 117.8 a theh chhuak a. F1 chu 2026 hmaa Turkey-a hruai let chu an thil tum ber a ni a, an duh ang hun takah thleng thei lo mah se 2027-ah an thleng dawn ta tho.