English football rorel turin City?

Pep Guardiola leh a nauten kum 2026 kum tir thleng kha chuan season duhawm lo hmang mah se, April thla tawp a thlen meuh chuan English football-a nomawi chawi vek thei dinhmunah an ding leh ta.

Arsenal hneha League Cup nomawi chawitu Manchester City chuan FA Cup-ah final an lut leh ta a, Inrinni zan khan semifinal-ah Southampton chu 2-1 in an hneh.

Saints hian minute 79-naah Finn Azaz hmangin goal hmahruai khung mah se, Pep-a naute an insang phek a, Jeremy Doku leh Nico Gonzalez hmanga Championship club chhangletin, 2-1 in an chak.

City hian tun hnaiah Premier League champion beiseina an nei thar leh bawk a, Arsenal-in Inrinni zanah Newcastle United hnehin tlanpel leh mah se, match khatin an khel tlem–English football-a nomawi pathum chawi vek thei dinhmunah an ding mek.

Hahdam takin...

City boss Pep-a'n EPL nomawi chawi tuma Arsenal nena an inumna boruak a hautak dawn tih a hrechiang a, FA Cup semifinal-ah meuh pawh a neih ṭhat ber a thawhchhuahpui lo!

Kar laihawla Burnley nen an inkhelh ṭum aṭangin player pariat ngawt a siksawi a, captain Bernardo Silva, Erling Haaland, Jeremy Doku leh Gianluigi Donnarumma te ho pawhin bench lamah hun an hmang ṭhap.

City tan Omar Marmoush-a'n chance duhawm nei mah se, Saints goalkeeper Daniel Peretz chuan a kein a lo dang a, Leo Scienza chuan City a barakhaihah inngai mah se, offside vangin a goal khung pawm a ni lo bawk.

Southampton hian minute 55-naah target-ah a vawi khat nan shot nei ve chauh mah se, Ross Stewart-a shot hi City keeper James Trafford tan buaina tham a tling lo. City tan Savinho pawhin chance a nei a, mahse, Peretz-a'n a dang leh tlat.

A tawpah 'drama'

Hun tawp nan minute 11 chauh a awm tawh tihah City chu barakhaih an ni a, goal khung beiseia Haaland luhtirtu Pep-a team ten goal an chhuah tlat–yard 20 vela hla aṭanga Finn Azaz-a shot chu Trafford-a tan dan theih a ni lo.

Mahse, Arsenal pet chhuaktu Southampton hlim chhung erawh a rei lo takzet. Minute hnih hnu lawkah Jeremy Doku-a'n ṭha zetin City tan si phurh a rawn sut a, 1-1 a ni.

Saints tan Kuryu Matsuki chuan chance duhawm a nei ve leh a, mahse, Japanese midfielder shot ṭha tak chu Trafford bawkin ṭha takin a dang. City erawhin an chance neih an hlah ve lo–Nico Gonzalez chuan box pawn aṭangin kawh pawtin a pet a, a lut chiang hle.

Minute 87-naah City-in 2-1 in hma an hruai a, team nem zawk Saints tan thil danglam thlentir turin a harsa tawh. Hun tawp thlengin goal dang a lut tawh lo a, 2-1 in City an chak a, FA Cup final an lut.