Mumbai-in goal an khung lo

ISL nomawi inchuh a 'hot' zel–Bengaluru khelmualah Mumbai City-in goal an khung thei lo a, team pahnih hi 0-0 in an inhnehtawk. Mumbai hi table-ah pathumna an ni zui a, match khata khel tam zawk ni chungin, point khatin hmahruaitu Mohun Bagan an phak lo.

Mumbai tan Lallianzuala Chhangtein goal khung theihna chance nei mah se, keeper Gurpreet Singh Sandhu a tlan hel vek hnuah, goal-ah a chantir thei lo.

Inrinni zana inkhelah Hmingthanmawia Ralte (Valpuia) pawhin Mumbai tan goal khungna remchang nei mah se, goal-ah a chantir thei lo a, Gurpeet-a'n ṭha takin a dansak.

Mumbai tan hian Zothanpuia chuan bul ṭan bawkin, Lalnuntluanga Bawitlung chu bench aṭangin a lut–Bengaluru tan Lalremtluanga Fanai chuan inkhel bul a ṭan bawk.

Jamshedpur-in 4-1 in Chennaiyin an sawp a, Men of Steel tan Sanan Mohammed-a'n goal hnih khungin, Raphaël Messi Bouli leh Nikola Stojanovic ten goal khat ve ve an khung bawk a, Chennai club tana S Prakadeswaran goal khungin awmzia a nei phak lo.

JFC tan Lalhriatpuia Chawngthu chuan bul ṭanin, Mark Zothanpuia chu bench aṭangin a lut a, Chennaiyin tan Lalrinliana Hnamte leh Laldinliana Renthlei ten bul ṭanin, PC Laldinpuia chu bench aṭangin a lut bawk.

FC Goa tan pawh champion beiseina a nung thar zel. Zirtawpni zan khan NorthEast United chu 2-0 in an hneh a, Dejan Drazic leh Mohammad Yasir ten goal khat ve ve an khung–point khat chiahin hmahruaitu Bagan an thlau.

Highlander tan Lalrinzuala chuan bul ṭanin, Lalbiakdika chu bench aṭangin a lut a, Goa lamah Ayush Chhetri chuan bul a ṭan a, Daniel Lalhlimpuia chu bench aṭangin a lut thung.