Inter Village chhunzawm dawn

MBOCWWB 8th Inter Village Football Tournament 2026 round of 32 chu vawiin hian RG Stadium leh Durtlang Playground-ah chhunzawm a ni dawn. Inlan tur zingah football thiam veng Dinthar leh Armed Veng te an tel a, inkhel hi BR Studio YouTube channel-ah a en theih ang.

RG Stadium-ah Dintharin chawhma dar 9:30-ah Samlukhai an hmachhawn dawn a, tun hnaiah Dinthar an tlak hniam avangin chak tur hriatthiam a har. Dinthar tan Samuel Laltlanthanga a la khel a, tlarhma lamah a tawnhriat a pawimawh ang.

Darlawngin Bawngkawn an pet tla a, vawiin chhun dar 11:30-a Bethlehem an hmachhawn hunah inrintawkna an ngah khawp ang. Champion lai Sihphir Venghlunin chawhnu dar 2:00 Falkawn an hmachhawn dawn a, an khelh tawhna thlir chuan Sihphir Venghlun tan harsa tur awmin a lang lo.

Durtlang playground-ah Kanan leh Kulikawn ten bul an ṭan dawn a, Armed Veng leh Laipuitlang ten an chhunzawm dawn. En châkawm ber erawh Chawnpui leh Tlungvel a ni ang. Chawnpui tun ṭum inelna an la thutak a, Zemabawk sawp tawhtu hian Chanmari West hnehtu Tlungvel lakah fiahna an hmachhawn ang.

Tun ṭum inelnaah hian Republic Veng, Venghlui, Bethlehem Vengthlang, Bawngkawn West, Salem Veng, Ramhlun South leh Saikhamakawn ten last 16 an lut tawh a ni.