An champion chhan tilangtu Bayern

German Bayern Munich chuan Inrinni zan khan, first half-a goal thum an chhuah hnuah, goal li khungin inlehthalna ropui a lantir a, 4-3 a Mainz hnehin khualmualah an chak.

Mainz tan Dominik Kohr, Paul Nebel leh Sheraldo Becker ten goal an khung a, Bayern tan Nicolas Jackson, Michael Olise, Jamal Musiala leh Harry Kane ten goal khat ṭheuh an khung.

Mewa Arena, Mainz-a inkhelah mualneituin bul an ṭan ṭha zawk a, minute 15-na lekah Kohr-a'n hnai takin chiang zetin Mainz hmahruaina goal a khung.

Minute 29-naah Nadiem Amiri-a pet chu Bayern keeper, Jonas Urbig-a'n ṭha takin dang mah se a per let chu Nebel-a'n kawh takin a khung tho a, an hmahruaina a belhchhah.

First half hun pek belhah Amiri ball pet bawk chuan ban a per a, hnai tak aṭangin Becker-a'n a per chu a pet goal-in, Mainz-in first half an thunun hneh hle.

Bayern coach Vincent Kompany-a'n champion tawh mah se, chak loh a duh lo tih lantirin Kane, Olise leh Musiala te an luhtir. Goal khung turin hun an duh rei lo a, minute 53-naah Jackson-a'n an siphurh sut ṭhen bul a ṭan.

Minute 73-naah Olise-a'n ding lam sir aṭangin, mawi taka pet kual lutin an goal hnihna a khung. Bavarians an phur laklawh a, minute sarih hnu lawkah Olise cross chu Musiala-a'n goal-ah chantirin an siphurh an sut zo.

Minute thum hnu lawkah Bayern-in goal an khung leh nghal a, Musiala cross chu Daniel Batz-a'n hmun himnah a dang per zo lo a, Kane-a'n awlsam takin an chakna goal a khung.

Bayern coach Vincent Kompany-a'n substitution a siam fuh a, a luhtir pathumten goal an khung vek. Bavarians hian Champions League semifinal a Paris Saint Germain an tum hunah inrintawkna an ngah sawt ang.