FIFA Congress-ah Tetea Hmar

Mizoram Sports Minister leh Mizoram Football Association President ni bawk, Lalnghinglova Hmar chuan FIFA Congress hmang turin nimin khan New Delhi a chhuahsan a, April 30, Ningani hian Vancouver, Canada-ah FIFA inkhawmpui lian hi neih a ni ang.

AIFF League Committee chairman Tetea Hmar hi Asian Football Confederation hnuaia Standing Committee on Social Responsibility-ah member a ni bawk a, football khawvela rorelna sang ber FIFA Congress-ah hian AIFF aiawhin a tel dawn a ni.

FIFA Congress-ah hian ram 211 aṭangin palai 1500 chuang an kalkhawm dawn a, khawvel huap football inrelbawlna pawimawh tak tak relin, kum 2031 leh 2035-a hmeichhe World Cup thlengtu tur an thlang nghal bawk ang.

Vancouver-ah hian FIFA Congress hmain Asian football-a thuneitu sang ber Asian Football Confederation Congress vawi 36-na chu neih a ni nghal dawn a, vawiinah he inkhawmpui hi neih tur niin, AIFF aiawhin Tetea Hmar hi a tel nghal dawn bawk - an rel tur zingah 2027 leh 2028 atana AFC budget a tel.

Mizoram sports minister Tetea Hmar hi kum 2017 khan FIFA Congress-ah India aiawhin a lo tel tawh a, hemi ṭum hian Bahrain-ah khawmpui hi neih a ni.