East Bengal khelmualah Odisha

ISL a 'hot' chho zel a, parukna East Bengal pawhin champion an la beisei - Kolkata club hian an hmelma, hmahruaitu Mohun Bagan chu point nga chauhin an phak lo a, match khatin an khel tlem thung.

East Bengal hian zanin dar 7:30-ah Odisha an mikhual dawn a, an chak chuan khelh zat inangah, Bagan hi point hnih chauhin an thlau tawh dawn - ISL-ah match 13 bak an khel dawn lo.

Kolkata club hian Mizo player paruk ngawt kawl mah se, Edmund Lalrindika chu regular taka bul ṭan awmchhun a ni a, defender Lalchungnunga leh striker David Lalhlansanga te hmuh turin an awm ṭhin bawk.

Odisha hian Mizo player panga kawlin, K. Lalṭhathanga (Puitea), Isak Vanlalruatfela leh Vanlalzuidika Chhakchhuak te chu inlan ngun deuh an ni a, zaninah pawh inlan leh tura beisei an ni.

Pathianni zan khan ISL match khat khelh niin, Sporting Club Delhi leh Mohammedan SC chu 2-2 in an inhnehtawk. Delhi club hian Matija Babovic hmangin vawi hnih ngawt hma hruai mah se, Mohammedan tan T. Adison Singh leh Hira Mondal ten an chhanglet a, 2-2 in an ṭin.

Delhi tan Augustine Lalrochana inlanin, Lalngaihsaka leh Lalthankima leh Mohammedan tan bul an ṭan a, Rochharzela chu bench aṭangin a lut bawk.