College Veng tlangval Shaun-a podium-ah a lawn

India rama bike intlansiaka inelna MRF MoGrip FMSCI National Supercross Championship 2026 season round 2 -ah College Veng tlangval Shaun Lalremruata Chhangte chu inelna pahnihah pathumna ve ve niin, ṭum hnih podium-ah a lawn. Inelna hi April 25, Inrinni khan Navelim, Goa-ah neih a ni.

Shaun hi India ram pumpuia no. 2 a nih mekna private expert class leh class dang dangah a tlan leh a, private expert class-ah hian pathumna a ni. Pathumna ni tur hian finishing line thlen hma chiahin a hmaa mi mawi zetin a zuan khum a, podium-a ding tur zingah a inhlangkai.

Indian novice class-ah company bike-te leh company rider ṭha tak takte karah vannei lehin podium a lawn leh a, pathumna bawk a ni. Shaun hi a ṭhianpa Vanlalhmangaihsanga'n pit mechanic turin a tlan apiangin a telpui a, hlawhtlinna chan kawngah a pawimawh hle.

Shaun hian kum 2024 khan nomawi pali a hawn a, nikum khan pathum a la leh bawk. College Veng tlangval Shaun chuan, "Tun ṭuma nomawi pahnih ka chawi thei hi Pathian vang chauh a ni a, ka tana theihtawpchhuaha min lo ṭawngṭaipuitute chungah thinlung takin lawmthu ka sawi," tiin a sawi. Tun dinhmunah India ram pumpuiah private expert class-ah Shaun hi National Supercross Championship ranking ah pahnihna a ni mek a ni.