Inter tan nghah hret a ngai

Serie A hmahruaitu Inter Milan chuan Pathianni zan khan, 2-2 in an mikhualna ramah Torino an inhnehtawkpui a, hmahruaitu nih chhunzawm mah se champion turin an nghah leh hret a ngai dawn.

Milan club hian Marcus Thuram leh Yann Aurel Bisseck te hmangin goal hnihin hmahruai mah se, Torino-in Giovanni Simeone leh Nikola Vlasic te hmanagin an sut a, chak zawk an awm lo.

DiMarco a vul

Olimpico di Torino-a inkhelah mihkual team an hlauhawm hmasa zawk a, minute sarihna lekah Manuel Akanji-a'n hnai tak aṭangin a tauh lut thei lo. Inter-in goal an khung ta tho a, minute 23-naah Federico DiMarco cross chu Thuram-a'n a tauh goal a, Inter hma a hruaipui. Thuram hian tun season Serie A-ah goal 11 a khungna chiah a ni.

Minute 61-naah Inter-in goal an khung leh a, DiMarco aṭang bawka chhuak a ni. Italian defender corner pet ṭha tak chu Bisseck-a'n goal kilah tak a tauh lut a, an hmahruaina a belhchhah.

DiMarco hian tun season Serie A bikah assist 15 a nei tling chiah a, defender thil tih atan chuan a namai lo hle. DiMarco hi Inter tan tlarhnungah a ṭangkai tluk zetin, tlarhma a pui ṭha a, a vanneih zan ni se goal khung thei tur a ni.

Torino an tho

Goal hnih an chhuah hnuah Torino an harhchhuak a, minute 70-naah Emirhan Ilkhan leh Simeone ten mawi taka an in pass hnuah, Argentine forward Simeone-a'n mawi takin Yann Sommer a chip khum a, an si phurh a sut ṭhen.

Goal khungtu Simeone hi Atletico Madrid coach, Diego Simeone fapa a ni a, tun season league bikah goal 10 a khungna chiah a ni. Giovanni hian kumin World Cup-ah an ram tan inlan a beisei ngam ang.

Torino an phur chhunzawm a, chance an neih nual hnuah vanneihna an lamah a ṭang. Minute 79-naah Carlos Augusto handball avangin penalty an hmu a, West Ham United midfielder hlui Vlasic-a'n khungin an siphurh a sut zo.

Cristian Chivu nauten goal khung tumin innawr viau mah se, hun tawp thlengin goal an khung thei lo a, an result-a lungawi chu an tih theih tawk a ni.

Engtin zel?

Serie A-ah match li chiah khelh tur a awm tawh a, Inter hi an chak zawh loh avangin an hnuai chiaha awm Napoli nen point 10-in an inthlau.

An inthlauhna hi la tam mah se Inter hi an chetsual leh chuan a pawi thei dawn a, Coppa Italia final khelah hmabak an nih bawk avangin, an nomawi beisei lai hi an thlauh thut thei.

Hetihlai hian Milan club pakhat zawk AC Milan chu, Pathianni zan vek khan Juventus nen goal khung loin an inhnehtawk a, chhiarkawp danah Milan pawh hian nomawi la chawi thei mah se, an tan thil a harsa tawh dawn a, nomawi chawi loin season an khar a rinawm tawh zawk.