UCL khelh tum Stuttgart dinhmun him lo

Pathianni zan Bundesliga khelhah Stuttgart chuan, an mikhual Werder Bremen chu 1-1 in an inhnehtawkpui a, palinaah awm chhunzawm mah se Hoffenheim nen an point hmuh zat a inang tawh.

MHPArena, Stuttgart-a inkhelah mikhual team-in goal an khung hmasa zawk a, minute 18-nah lekah Japanese defender Yukinari Sugawara-a cross satliah chu, Jens Stage-a'n goal kilah tak pet lutin, an team hma a hruaipui.

Mualneitu team tan minute 61-naah Ermedin Demirovic-a'n, Bilal El Khannouss-a cross chu hnai tak aṭangin a tauh lut a, an si phurh a sut. Bosnian forward Demirovic hian chakna goal thun theihna chance nei mah se, Werder Bremen keeper Mio Nagata a paltlang zo tawh lo a, goal dang lut tawh loin inkhel a tawp.

Stuttgart hi an match hnu hnuhnung pahnihah an chak zo lo ve ve a, anmahni hnaih bertu Hoffenheim an chak avangin an point 57 ve ve an hmu a, goal difference-ah an neih ṭhat avang chauhin an sang zawk.

Bundesliga-ah match li chiah khelh tur a awm tawh a, Stuttgart hi DFB-Pokal final khelh hmabak an nih bawk avangin, Champions League khelh an tum a nih chuan an chetsual a thiang tawh lo.