Ngaihven hlawh Miami GP

Thla khat chhung chawlh a nih hnuah, Formula 1 ṭan a ni leh dawn a, May 3, Miami International Autodrome-ah Pathianni zan dar 1:30-ah Miami Grand Prix neih a ni leh dawn a. West Asia Indona avanga Bahrain leh Saudi Arabia GP ṭhulh a nih hnua, neih leh hmasak ber tur a nih avangin khawvelin a ngaihven.

Miami Grand Prix hi kum 2022-a Formula 1 calendar-a a tel ṭan atangin, a hmun dangdai avangin hriat hlawh berte zinga mi a ni der tawh. Miami hian intlansiakna hmuhnawm bakah khawvel khawpui ropui berte zinga mi a nih avangin khawvelin Miami GP a ngai hlu ṭhin.

Inelna neihna hmun tur Miami International Autodrome-ah hian, kawng kawi harsa tak bakah Florida chhim lama an hmuh ṭhin, thingkung intlar leh lawng chawlhna mawi takte chu festival boruak nen a chawhpawlh thiam ṭhin hle. He intlansiakna hi a lan dan aṭang ringawt pawhin a danglam bik tih a hriat theih.

He intlansiakna hian mi hriat a hlawh zel a, 2026-ah pawh Miami hian May thla tir lamah "Sunshine State"-ah F1 a lo lawm lut leh dawn. Miami Grand Prix-ah hian Sprint Qualifying hmaa neih tur Free Practice session vawi khat chiah neih a ni dawn thung.

May 2, Inrinni-ah Sprint qualifying hi neih hmasak a ni ang a, chumi hnuah Grand Prix Qualifying-in a chhunzawm dawn a ni.