Game 4-ah Lakers chak zo lo

NBA playoff khelh mekah nimin zing khan Los Angeles Lakers chuan 115-96 in Houston Rockets an hneh lo a, Lakers hian 3-1 in hma la hruai mah se vawi li chak a ngaih avangin, playoff round 2 kai turin an nghah hret a ngai.

Toyota Center, Houston-a inkhelah team pahnihte an inhnehtawk a, Rockets-in bul ṭan ṭha zawkin, first quarter-ah 26-21 in hma an hruai. Second quarter-ah pawh Rockets an chungnung zawk a, 56-46 in an hmahruaina an tizau.

Third quarter-ah pawh Rockets bawkin inkhel an thunun a, point 34 score-in 90-65 third quarter an khar a, point 25 zetin an inthlau. Fourth quarter-ah Lakers-in theihtawp chhuahin an bei let a, point 31 zet score tling mah se an chak zo chuang lo.

Rockets tan Amen Thompson-a'n point 23 neiin a score hnem ber a, Thompson bakah hian player pali - Tari Eason (20), Alperen Sengun (19), Reed Sheppard (17) leh jabari Smith Jr (16) tenn point 10 an score tling vek a, Rockets chak nan an thawhhlawk hle.

Match hmasa lama an phurna Lakers-in an hloh a, game 3-a che ṭha tak LeBron James-a'n beisei a pha lo a, point 10 chiah a score thei. LeBron bakah Deandre Ayton (19) leh Rui Hachimura (13) te chiahin point 10 an score tling a, Lakers chak nan player dangin an pui ṭha tawk lo.

Lakers tan an guard pahnih, Luka Doncic leh Austin Reaves te chu hliam vangin an la inlan thei lo a, mahse Rockets tan Kevin Durant a inlan bik loh avangin chhuanlam a tling lo. First round-ah Doncic a inlan theih a rinawm loh a, Lakers hi an tlang a nih chuan second round-ah a khelh theih a beiseiawm. Hetihlai hian Reaves erawh hma a sawn chak a, game 5 khelh a ngai a nih chuan a khel theih tawh a rinawm.