Modi-a'n Indoor Cricket Academy a hawng

India prime minister Narendra Modi chuan nimin khan CAM Cricket Academy a hawng. Modi hian Paljor Stadium, Gangtok aṭangin Sihhmuia CAM Cricket Academy bakah Nagaland, Arunachal Pradesh, Manipur leh Meghalaya-a cricket academy a hawng.

Sihhmuia Cricket Academy hi vaibelchhe 18.25 senga sak a ni a, India rama cricket thuneitu sang ber BCCI rawn tum vek a ni. Ground floor-ah gymnasium, swimming pool, cafeteria, I.T. room, locker room, ice bath area, massage/recovery zone leh chawlh hahdamna (lounge) te a awm. First floor-ah practice pitch, adminstrative office leh store room te a awm a, practice pitch hi second floor aṭangin a thlirna a awm.

Cricket Association of Mizoram general secretary Lalfakawma Varte chuan, "Mizoram ruah tui a tlak rei avangin harsatna kan tawk ṭhin a, indoor kan neih avanga Mizoram team inbuatsaihna atana phai lama sum sen ṭhin tam zawk hum a ni thei dawn," tiin a sawi a, Indoor Cricket Academy pian chhoh dan leh sum leh pai hman zat a tarlang bawk.

CAM president Robert Lalfamkima chuan, "Indoor ṭha tak kan neihna chhan hi hruaitu lo ni tawhte thawhrimna rah a ni. Season tharah Mizoram team pathum elite group-ah an khelh dawn avangin indoor hi a ṭangkai lehzual dawn," tiin a sawi a, indoor chu a hmangtuten dimdawi leh duat taka hmang turin a chah bawk.