Aizawl FC an him dawn em?

Indian Football League relegation round chu zanin dar 6:30 aṭangin khelh ṭan a ni dawn a, Deccan Arena-ah Aizawl FC leh Namdhari Sports Club nen an inkhel dawn. Relegation round bikah Mizo club hi a chung berah awm mah se a hnuai bera awm Namdhari nena an inthlauhna hi point hnih chauh a nih avangin ngaih ṭha taka awm thei a ni lo.

Relegation Round bik hi Sreenidi Deccan khelmual Deccan Arena, Hyderabad-ah vek khelh a ni dawn a, point dinhmun thlirin inkhel a nung ṭha tawh tih a chiang bawk. Mizo club hian April 26, Pathianni khan Hyderabad an pan a, nimin khan Deccan Arena-ah training an nei tawh.

Aizawl FC hian tun season match hmasa berah Namdhari an hmachhawn tawh a, Mizo club hian K. Vanlalhriatzuala goal mawi hmangin goal an khung hmasa zawk. Mahse, injury time-ah pawh minute ruknaah Abdoulaye Diallo hmangin Punjab club-in siphurh an sut a, 1-1 in inkhel a tawp.

Tun hnaiah club pahnih hi an che chhe ve ve a, Aizawl FC-in Mizo Derby-a Chanmari FC an hneh hnuah chak hmel an hmu tawh lo. Coach R. Lalruatfela hote hian khualmuala match hnuhnung paliah Sreenidi Deccan chiah an chelh a, a bak zawngah an mualpho vek. Gokulam Kerala lakah 4-2 in an chak lo a, Dempo lakah 3-0 a chak lo lehin match tawp berah Shillong Lajong lakah 6-1 in an mualpho.

Namdhari pawh hian match hnuhnung paliah chak hmel an hmu lo a, match hnuhnung pathumah an chak lo a, match tawp berah Chanmari FC lakah 4-1 in an mualah an mualpho. Chanmariin Namdhari an sawp avangin Aizawl FC pawhin inrintawkna an ngah sawt ang.