Vawiin aṭangin Inter Village Football last 16

MBOCWWB 8th Inter Village Football Tournament 2026 last 16 chu vawiin aṭangin khelh ṭan a ni dawn. Chawhma dar 11:00-ah Republic Veng leh Venghlui te an inhmachhawn ang a, chawhnu dar 2:00-ah Ramhlun South leh Saikhamakawn te an inkhel chhunzawm ang.

Inelna hi RG Stadium, Mualpuiah vek khelh a ni tawh dawn a, a hmuna inkhel en man hi Rs 50 niin BR Studio YouTube channel aṭangin a en theih dawn.

Aizawl South I Derby-in last 16 ṭan a ni dawn a, Venghlui lakah CYMA Football champion lai Republic Veng buk a rit zawk. Chutihrualin coach Lalsangzuala Hmar enkawl Republic Veng hian ISL, IFL leh I League 2nd Division vangin an champion ṭuma an player pawimawhte an chawr thei lo a, Venghlui lakah an fimkhur a ṭul ang.

Republic Veng hian last 16 lut turin team ṭha Armed Veng South penalty shootout hmangin an hneh hram a, Venghlui hian Zotlang 4-1 in an sawp thung. Venghlui tan Varun Raj Tamang-a'n goal li a khung a, Republic Vengin Varun hi an ven uluk a ṭul dawn.

Inkhel hnuhnung zawkah NECS Cup-a vawi thum champion tawh Ramhlun South an inlan dawn a, Saikhamakawn lakah buk rit zawk mah se MPL club nei veng hi zuam ngawt a rem lo ang. Ramhlun South hian last 16 lut turin Hlimen 6-2 in an sawp a, Saikhamakawn lakah pawh harsatna nei loin chak an tum ang.