World Cup khel lo tur Simons

Netherlands attacking midfielder Xavi Simons chuan ACL hliam avangin World Cup a khel thei dawn lo a, Premier League aṭanga tla thei dinhmuna ding mek Tottenham Hotspur tan pawh a inlan thei tawh dawn lo.

Inrinni zan khan Spurs chuan 1-0 in Wolverhampton Wanderers an hneh a, he inkhelah hian hliam vangin Simons lakchhuah a ngai a, Wolves defender Hugo Bueno nen an insu palh a ni.

Simons chuan, "Hringnun hi a nunrawng ve fo ṭhin, tiin an sawi a, chutiang chiah chu ka tawng ta a ni. Ka season a tawp ta tih hi pawm thiam ka tum a, mahse, harsa ka ti hle.

"Zep lohah chuan na ka ti takzet a, engkim mai hian awmzia an nei lo a ni," a ti thlawt! Tottenham pawhin thuchhuah siamin, "Xavi Simons chuan a khup dinglamah ACL hliam a nei a, kar lo awm turah zai nghal a ni ang," an ti.

Simons chuan, "Ka team tana theihtawp chhuah hi ka duh ber chu a ni a, mahse, tunah chuan ka thei ta lo a, World Cup pawh ka khel dawn lo. Nipuiah kan ram jersey ka ha thei dawn lo a, pawm thiam tumin ka bei ang.

"Mahse, ka ṭhiante tan team mate ṭha tak nih ka tum reng a, kan hmabaka mawhphurhna awm hi kan hlen ang tih ka ring tlat. Tunah zawng he hun harsa tak hi rinna, chakna, dawhtheihna leh beiseina nen paltlang ka tum dawn a ni," a ti.

Netherlands tana vawi 34 inlan tawh Simons hian nipui transfer-ah khan RB Leipzig aṭangin Spurs hi pound maktaduai 52-in a zawm a, mahse, league match 28 a khelhah vawi 19 chiah bul ṭanin, goal hnih a khung a, assist vawi nga a nei.

Spurs hi Premier League aṭanga tla thei dinhmunah ding mekin, table-ah 18-na an ni mek a, a him china awm West Ham chu point hnihin an phak lo mek - match hnih chiah khelh tur a awm tawh.