Atalanta-in Europe hlat zel

Thawhṭanni zan Serie A inkhelah Atalanta chuan, table-a 16-na Cagliari chu 3-2 in an hneh lo a, Atalanta tan result duhawm a ni lo a, season tharah Europe inelnaa tel thei lo dinhmunah an ding.

Cagliari tan Paul Mendy-a'n goal hnih a khung bakah, Gennaro Borrelli-a'n goal khat a thawh ve bawk. Atalanta tan Gianluca Scamacca-a'n goal hnih khung mah se a team chhan nan a tawk lo.

Inkhel a nung

Unipol Domus, Cagliari-a inkhelah mualneituin bul an ṭan ṭha a, ṭan aṭanga second 15-na lekah Michel Ndary Adopo-a cross chu Mendy-a'n tauh lutin, a team hma a hruaipui nghal. Atalanta defender ten Mendy an veng ṭha tawk lo.

Mualneitu team an phur laklawh a, minute riatnaah corner aṭanga ball kal zel chu Mendy bawkin harsa takin a pet a, Atalanta defender Berat Djimsiti-a'n lo dang perin goal-ah a lut leh a, keeper Marco Carnesecchi tan dan ngaihna awm tawh lo a, Cagliari-in an hmahruaina an belhchhah.

Goal hnih an chhuah hnuah Atalanta ben harhin an awm a, minute 40-naah Scamacca-a'n mawi taka pet kual lutin an siphurh a sut ṭhen. Scamacca-a'n a la duhtawk mai lo a, minute nga hnu lawkah Giorgio Scalvini cross chu khung lehin an siphurh a sut zo a, 2-2 in chawlhlawk hman a ni.

Second half-ah Cagliari bawk an hlauhawm a, an ṭan deuh chiah tihin Michael Folorunsho-a'n thui tak a khalh hnuah petin, Sead Kolašinac-a'n dang mah se a per chu Borrelli-a'n a pet goal tho a, Cagliari-in hma an hruai nawn.

Atalanta-in Mario Pašalić, Nikola Krstović, Giacomo Raspadori te hmangin chance ni chhunzawm mah se hun tawp thlengin goal an khung thei tawh lo a, a tlawm zawkah an ṭang.

Beiseina a thamral

Tun season-ah Atalanta-in bul an ṭan chhe lo a, mahse 2026-ah beisei an pha lo hle a, an match hnuhnung pangaah vawi hnih chiah an chak thei.

Table-ah pasarihnaah awm mekin Conference League khelk pha tur parukna, AS Roma chu point sarihin an pha tawh lo. Serie A-ah match li chiah khelh tur a awm tawh a, Atalanta hi an chak vek a nih pawhin midang result-a an innghah a ṭul tawh ang.