Joshua leh Fury inhnek dawn

British boxer Anthony Joshua chuan nikum December-a a accident hnua, a vawi khat nan a inhnek leh dawn a, Albanian boxer Kristian Prenga nen Riyadh, Saudi Arabia-ah an inhmachhawn dawn.

Mipuiin Joshua lo let an ngaihven chhan tak erawh Tyson Fury nen inhnek tura inremna an neih vang a ni. British boxer pahnihte hi an inhmachhawn ngei dawn tih a chiang tawh a, Joshua leh Gypsy King inhnek tur hi boxing chanchina hriat reng tlak tur a nih a rinawm.

Boxing promoter Eddie Hearn chuan, Joshua hian Fury a hmachhawn hmain Prenga nen an inhnek phawt a ngai dawn tih a sawi a, Albanian boxer hi a hming langsar lo mah se vawi 20 hnehna a lo chang tawh a, vawi khat chiah a la tlawm avangin Joshua tan a awlsam dawn lo.

Joshua chuan, "Hun eng emaw chen chu ngai ka awh leh theih nan ka inenkawl tawh a, tun hi ring chhunga ka luh leh hun chu a ni. Hun rei tak hnua ka inhnek leh hmasak ber tur a nih avangin ka phur tawh hle," a ti a, Prenga hmachhawn a châk tawh hle.

Kum 36 mi Joshua inhnek hnuhnung ber chu nikum December-a, Jake Paul nen an inhnek daih tawh kha a ni a, hemi hnu hian car-a a chetsual avangin a inhnek leh lo. Hetihlai hian Fury erawh April 11 khan Tottenham Hotspur Stadium-ah, Russian boxer Arslanbek Makhmudov nen inhnekin hnehna a chang.

British boxer pahnihte hi world champion vawi hnih lo ni ve ve tawh an ni a, khawvel huapa boxer ṭha zinga mi an nih avangin mipui ngaihven an hlawh hi a mak lo. Fury leh Joshua te inhnek hun leh hmun tur hi puanzar a la ni lo a, Hearn chuan November thlaah chuan an neih a beisei thu a sawi.