Levante an la him lo

La Liga-ah champion tur a la chiang lo a, relegate tur an la chiang bik lo. Thawhṭanni zan inkhelah Levante leh Espanyol te goal awm loin an inhnehtawk a, Levante-in an chunga awmte hnaihna hun ṭha an bawhpelh.

RCDE Stadium-a inkhelah mualneitu Espanyol-in ball chang hnem hret mah se, an chungnunna bik a awm chuang lo a, Víctor García-a'n a chance neih a chhawr ṭangkai thei lo chu an vannei zawk hial.

Espanyol-in vawi tam chance nei mah se, Levante keeper Matthew Ryan an paltlang thei lo a, Arsenal tan pawha lo khel tawh Ryan a khel ṭha a, a team a chhanhim.

Minute 88-naah Espanyol midfielder Pol Lozano-a'n ṭul lo takin yellow card pahnihna a hmu a, hnawhchhuah a ni. Mahse Levante tan a tam zawk an nih hman ṭangkaina hun a awm tawh lo a, an result-ah an lungawi a ṭul.

Tun season La Liga-ah table chung lam ho inthlauhna sang deuh mah se, table laihawla awm leh a mawng lam an inthlau lo. Match nga khelh tur a la awm a, chhiarkawp danah a mawngphaha awm Real Oviedo pawhin pakuana Osasuna an la lehpel thei a, relegation battle a la pui dawn chauh.